Ադրբեջանա-թուրքական ահաբեկչական ստորաբաժանումների կողմից հրահրված պատերազմի առաջին իսկ օրերին Ֆրանսիայի Ալֆովիլ քաղաքի հայ համայնքը մեկ մարդու պես ոտքի կանգնեց՝ սատարելու և աջակցելու արցախահայությանը։ Նպատակը մեկն էր՝ օր առաջ օգնության ձեռք մեկնել պատերազմի արհավիրքի հետ առճակատված Արցախի հայրենակիցներին և երեխաներին, որոնց խաղաղ և բնականոն առօրյան խաթարվեց թշնամու սանձազերծած ագրեսիայի հետևանքով։
11 ճամպրուկ Հայաստան հասցնելու առաքելությունն իրականացրած Անժելա Դեմիրճյանը պատմեց, որ ամեն ինչ կազմակերպվել է շատ արագ՝ մեկ գիշերում Ելենա Սաֆարյանի և Քրիստինե Արամյանի հետ միասին հավաքագրել են անհրաժեշտ օգնությունը, հիմնականում՝ դեղորայք և հագուստ։ Նա նշեց, որ Ալֆովիլի յուրաքանչյուր հայ իր պարտքն է համարել մասնակցություն ցուցաբերելու, իր լուման ներդնելու ոսոխի հրթիռակոծության տակ հայտնված խաղաղ բնակչությանը։
«Այսօր էլ զանգերը չեն դադարում, հարցնում են, թե ինչի կարիք են զգում տեղահանված արցախահայությունը։ Բոլորը պատրաստակամ են օգնելու, սատար կանգնելու մեր հայրենակիցներին»,- ասաց Անժելան՝ մանրամասնելով, որ ամեն օր այցելում է արցախցի փոքրիկներին և կանանց։
Քրիստինե Հովսեփյան
