Լե Դրիանը Էրդողանին կոչ է անում դադարեցնել Ֆրանսիայի հասցեին վիրավորանքները

Ֆրանսիայի արտգործնախարար Ժան-Իվ Լե Դրիանը ելույթ ունենալով Սենատում, ասել է, որ Փարիզն ակնկալում է Թուրքիայի ղեկավարության կողմից Ֆրանսիայի հասցեին վիրավորանքների, զրպարտությունների և սպառնալիքների դադարեցում:

Նախարարը նշել է, որ Ֆրանսիան տարաձայնությունների երկար ցուցակ ունի Թուրքիայի հետ՝ նշելով Անկարայի միակողմանի գործողությունները Արևելյան Միջերկրական ծովում, «ագրեսիվ քաղաքականությունը Լիբիայում» և Թուրքիայի քաղաքականությունը Լեռնային Ղարաբաղում:

«Բայց վերջին շաբաթներին մենք Թուրքիայի հետ հարաբերություններում դաշնակիցների համար անընդունելի մակարդակ տեղափոխեցինք: Վիրավորանքներ, զրպարտություններ, Ֆրանսիայի և Եվրոպայի դեմ ատելության արշավ սանձազերծելու ցանկություն … Սպառնալիքներ։ Մենք ակնկալում ենք, որ Թուրքիայի նախագահն ու նրա կառավարությունը անհապաղ վերջ կդնեն նման վարքին», – հայտարարել է Լե Դրիանը: