Ժողովուրդը որոշումներ կայացնելու իր իրավունքը ոչ մեկի չի՛ զիջել

«Եթե հիշում եք՝ 2018 թվականին, լինելով իշխանության մեջ, ասել էի՝ իշխանությունը դրսում է՝ փողոցում է, և դրսում գտնվող ուժերն էլ պետք է որոշեն, թե ով է լինելու հաջորդ իշխանությունը։ Այսօր էլ նույն մոտեցումն է. Իշխանությունը փողոցում է և իշխանությունից դուրս ուժերն էլ պետք է որոշեն՝ ով է լինելու հաջորդ իշխանությունը, վարչապետի թեկնածուն։ 2018-ին մարդիկ ըմբռնումով ընդունեցին այդ փաստը և անցնցում հեռացան իշխանությունից։ Նույնը հիմա պետք է լինի»,- 168.am-ի հարցին պատասխանել է «Տաշիր Գրուպ»-ի համասեփականատեր Կարեն Կարապետյանը։

Անակնկալ չէ, որ Կարեն Կարապետյանը այսպես է մեկնաբանում ստեղծված իրավիճակը, միայն տարօրինակ է, որ հայտնի գործարարը մի ամբողջ ժողովրդի ցանկանում է մոլորեցնել՝ լղոզելով ակնհայտ տարբերությունները։ Նախ 2018-ին փողոցում ժողովուրդն էր, իսկ այսօր՝ 17 կուսակցությունները, եթե ավելի կոնկրետացնենք, ապա նախկին մերժվածներն են և նրանց շվաքի տակ հենման կետ փնտրող քաղաքական նորելուկները, որոնց չնկատելու դեպքում, կենտրոնում կմնան ԲՀԿ-ն, ՀՅԴ-ն ու ՀՀԿ-ն, որոնք, ըստ Կարեն Կարապետյանի խոսքի, «պետք է որոշեն, թե ով է լինելու հաջորդ իշխանությունը»։

Իսկ եթե նույնիսկ կա ձևավորված հանրային պահանջ, որը ոչ մի կապ չունի հրապարակի ուժերի հետ, ո՞վ է ասել, որ պատերազմում կրած պարտությունն ու Փաշինյանի կառավարության նկատմամբ վստահության կորուստը ենթադրում է իշխանության զավթում և քրեաօլիգարխիկ համակարգի վերադարձ։

Միգուցե 2018 թվականի ոճով հանրահավաքներն ու պաստառները որոշ նմանություն են ապահովում, բայց միայն այդքանը։ Իմաստուն ժողովուրդը ոչինչ չի մոռացել, ոչինչ չի ներել։ Կորստից դառնացած է ու հիասթափված, բայց որոշումներ կայացնելու իր իրավունքը ոչ մեկի չի զիջել։

Քրիստինե Հովսեփյան