Այսօր պատգամավորական մանդատ ստացած Աննա Գրիգորյանը ճեպազրույցի ընթացքում մանրամասնեց՝ «Իմ քայլը» խմբակցությունից դուրս գալու որոշումը քննարկվել է խմբակցության գործընկերների հետ և, ըստ տիկին Գրիգորյանի, վերջինները ըմբռնումով են մոտեցել իր որոշմանը։ Իսկ համացանցում մի քանի օր շարունակվող քննադատությունները չեն համապատասխանում իրականությանը, իմքայլականները իրեն «սրերով չեն ընդունել Ազգային ժողովում»։
Եվ ընդհանրապես՝ երբ ունենք Արցախի և Սյունիքի անվտանգության խնդիր, երբ երկիրը կանգնած է լրջագույն մարտահրավերների առջև, անհատներին թիրախավորելը կեղծ օրակարգ է և չի նպաստում հասարակության հաշտեցմանը։
Աննա Գրիգորյանը լրագրողների հետ զրույցում հայտնեց, որ որոշումը համապատասխանեցրել է սյունեցիների հետ։ Նա հավելեց՝ ավելի հեշտ կլիներ պանգամավորական մանդատից հրաժարվելը, բայց ինքն ունի պարտավորություններ այն մարդկանց առջև, ովքեր ընտրել են իրեն։ Սյունիքի մարզի՝ վարչապետի հրաժարականը պահանջող քաղաքապետերի հետ խորհրդակցություններ չեն եղել, բայց նորաթուխ պատգամավորը մտահոգված է Սյունիքի ապագայով և իր ռացիոնալ ելույթներով հույս ունի նպաստել հետագա զարգացումներին։
Աննա Գրիգորյանը չժխտեց՝ բոլորս պատասխանատվության մեր բաժինը ունենք պատերազմում կրած պարտության համար, սակայն թիվ մեկ մեղավորը և պատասխանատուն Նիկոլ Փաշինյանն է։ Նրա խոսքով՝ վարչապետը պետք է հրաժարական տա, քանի որ անկարող է արժանապատիվ բանակցություններ վարել։
2018 թվականին Աննա Գրիգորյանը եղել է հեղափոխական թիմի գաղափարակիցը և մասնակիցը, սակայն երբեմնի թիմակիցների հետ առաջացել են տարաձայնություններ, երբ իշխանության եկած ուժը չի կատարել հեղափոխության կարևորագույն խնդիրը՝ չի վերականգնել սոցիալական արդարությունը։
Քրիստինե Հովսեփյան
