Բելառուսն Ադրբեջանից ռազմական օգնության է սպասում Ադրբեջանի վարչապետ Ասադովը գտնվում է Մինսկում: Այդ այցի օրակարգի եւ ժամանակացույցի մասին կողմերը պաշտոնական տեղեկատվություն չեն տարածել: Ասադովի ուղեւորության հիմնական նպատակի մասին կարելի է ենթադրել փաստից, որ վերջերս Բաքվում անցկացված սպառազինությունների «միջազգային» ցուցահանդեսին ներկա է գտնվել Բելառուսի ԶՈՒ Գլխավոր շտաբի պետը: Ադրբեջանի վարչապետի հետ հանդիպմանը Ալեքսանդր Լուկաշենկոն ասել է, որ Բելառուսը ժամանակին Ադրբեջանին միշտ օգնություն է ցուցաբերել, եւ ինքը հույս ունի, որ Ադրբեջանը փոխադարձ օգնություն կցուցաբերի: Բելառուսը, ինչպես իրազեկ աղբյուրներն են պնդում, զինանոցի մեծագույն մասը տրամադրել է Ռուսաստանին եւ ներկայումս սպառազինությունների սուր կարիք ունի: Իլհամ Ալիեւը հայտարարել է, որ Ադրբեջանի շուրջ «հազար անուն սպառազինություն եւ զինամթերք է արտադրում»: Բաց աղբյուրներից հայտնի է, որ Ադրբեջանի ռազմա-արդյունաբերական համալիրը Թուրքիայի տեխնիկական եւ տեխնոլոգիական աջակցությամբ յուրացրել է 155մմ. Տրամաչափի հրետանային արկերի արտադրությունը: Այդ զինամթերքի սուր կարիք ունի նաեւ Ռուսաստանը, որ ստիպված է Հյուսիսային Կորեայից հրետանային ռազմամթերք գնել այն պաշարներից, որ ժամանակին Խորհրդային Միությունն է մատակարարել «ժողովրդա-դեմոկրատական» Կորեային: Ադրբեջանը կարող է Բելառուսին ռազմամթերք եւ սպառազինություններ մատակարարել, քանի որ կողմերն ունեն ռազմական համագործակցության եւ փոխադարձ օգնության պայմանագիր, իսկ թե հետագայում դրանք որտե՞ղ կհայտնվեն՝ արդեն կլինի Լուկաշենկայի հոգսը: Բայց այդ դեպքում Ադրբեջանը կվերածվի Ուկրաինայի դեմ պատերազմին փաստացի Ռուսաստանի կողմից մասնակցի: Իսկ դա քաղաքական հետեւանքներ անպայման կունենա:
22:39
Ապրիլ 22, 2026
