Նոյեմբերի 9-ի եռակողմ հայտարարության բոլոր դրույթները կատարվում են մեծ էֆեկտիվությամբ՝ բացառությամբ հայ ռազմագերիների վերադարձի հարցի։ Այս մասին հայտարարեց ՌԴ ԱԳՆ նախարար Սերգեյ Լավրովը։
Ըստ Լավրովի՝ ռազմագերիների փոխանակման հարցում սկզբում խնդիրներ են առաջացել հայկական կողմում, քանի որ նոյեմբերի 9-ից հետո ներկայացված տվյալներն ամբողջական չեն եղել։ Ադրբեջանական կողմում նման խնդիրներ չեն եղել։ Արդեն կատարվել է՝ մինչև նոյեմբերի 9-ը՝ ռազմական գործողությունների արդյունքում գերեվարված զինվորների փոխանակում։
Նախարարը մանրամասնեց՝ այսօր խնդիր է առաջացել այն 62 ռազմագերիների մասով, որոնք գերեվարվել են դեկտեմբերի սկզբին Հադրութի շրջանում։ Ադրբեջանական կողմը նշում է, որ հայ զինվորները ռազմական գործողությունների այդ հատվածում են հայտնվել զինադադարի կնքումից հետո և նրանց հետ կապված հարցը պետք է քննարկվի նոյեմբերի 9-ի հայտարարությունից դուրս։
Լավրովի խոսքով՝ այդուամենայնիվ ռուսական կողմը, Վլադիմիր Պուտինը ջանքեր են գործադրում խնդիրը լուծելու ուղղությամբ՝ կրկին առաջնորդվելով «բոլորը բոլորի դիմաց» բանաձևով։ Այս հարցի շուրջ ՌԴ ԱԳՆ նախարարը հեռախոսազրույց է ունեցել հայ գործընկերոջ՝ նախարար Արա Այվազյանի հետ և լիահույս է, որ հարցը կլուծվի համատեղ քննարկումների շնորհիվ։
Նաև՝ Սերգեյ Լավրովի համար անհասկանալի են մնում բանավոր պայմանավորվածությունների կամ չհանրայնացված հավելվածի մասին խոսակցությունները, քանի որ այդպիսիք չկան։
Քրիստինե Հովսեփյան
