Բոլորը համաձայն են, որ Լեռնային Ղարաբաղի և Հայաստանի միջև լինի կապ․ Լավրով

Նոյեմբերի 9-ի հայտարարության մեջ Արցախի կարգավիճակի հարցը չի հիշատակվել կանխամտածված, քանի որ  դեռ ժամանակը չէ՝ այս մասին հայտարարեց Սերգեյ Լավրովը։

Ադրբեջանցի լրագրողի այն հարցին, թե արդյոք հաշվի է առնվելու Ադրբեջանի բողոքը հայաստանցի պաշտոնյաների՝ Լեռնային Ղարաբաղ այցերի դեմ, Լավրովը պատասխանեց․

«Բոլոր պայմանավորվածություններում, նաև նոյեմբերի 9-ի հայտարարությունում, ամրագրված է կողմերի համաձայնությունն այն հարցում, որ ապահովվելու է Հայաստանի ու Լեռնային Ղարաբաղի միջև կապը Լաչինի միջանցքով, որը լինելու է ռուս խաղաղապահների վերահսկողության տակ։ Հայաստանի կապը Լեռնային Ղարաբաղի հետ ոչ ոք չի կարող հերքել։ Տասնամյակների բանակցությունների ընթացքում երբեք չի քննարկվել Հայաստանն ու Լեռնային Ղարաբաղը միմյանցից կտրելու հարցը։ Եվ հենց այդ պատճառով Լաչինի միջանցքը՝ որպես հայեցակարգ, որևէ մեկի կողմից չի մերժվել։ Եվ այն, նախկինի պես, կողմերի համաձայնության, այդ թվում՝ մեր ադրբեջանցի հարևանների համաձայնության առարկա է հանդիսանում»։

Ըստ Լավրովի՝ բոլորը համաձայն են, որ Լեռնային Ղարաբաղի հայերի ու Հայաստանի հայերի միջև լինի կապ և պատճառներ չկան, այդ շփումներին խոչընդոտելու համար։

Նախարարն ակնարկեց, որ Հայաստանի պաշտոնյաները բավական քաղաքականացված հայտարարություններ են անում Լեռնային Ղարաբաղում, ինչը լարվածություն է առաջացնում, ուստի լավ կլինի խուսափել նմանատիպ հայտարարություններից։

«Գիտեք՝ խոսքը դառնում է նյութական ուժ։ Այդ պատճառով մեծ ուշադրություն ենք դարձնում Հայաստանի ու Ադրբեջանի ղեկավարությունների միջև շփումներին, վստահության մթնոլորտի ձևավորմանը։ Հենց այդ պատճառով էլ ներկայում Լեռնային Ղարաբաղի կարգավիճակի թեման, որպես առաջնահերթ հարց, առաջ քաշելու ժամանակը չէ»,- ամփոփեց Սերգեյ Լավրովը։

Քրիստինե Հովսեփյան