Էդմոն Մարուքյանը կարծում է, որ իշխանությունն արեց մի հետաքրքիր մանիպուլյատիվ քայլ, ինչը հաջողությամբ այսօր իր ավարտին է հասցնում։ Նոյեմբերի 10-ից սկսած ընդդիմադիր դաշտում եղել է մեկ պահանջ՝ վարչապետի հրաժարականը, որի վերաբերյալ ձևավորվել էր կոնսենսուս մինուս մեկ։ Այսինքն՝ վարչապետը պետք է հրաժարական տար, և լեգիտիմ խորհրդարանը պետք է ընտրեր նոր վարչապետ։ Ի պատասխան այս հայտարարությունների, ձևավորված հանրային ակնկալիքի, վարչապետը հայտարարեց արտահերթ ընտրություններ անցկացնելու մասին և սկսվեց ընտրությունների մասին «նիսյա» խոսակցություն։
Ըստ Մարուքյանի՝ բոլոր պրոբլեմները թողած, եղել են «նիսյա» քննարկումներ։ Արտահերթ ընտրությունների անցկացումը եղել է վարչապետի օրակարգը, որը չի մերժվել ընդդիմության կողմից։ Բոլորը սկսել են նախապատրաստվել, որից հետո Նիկոլ Փաշինյանը հայտարարել է հուշագիր ստորագրելու անհրաժեշտության մասին։
«Հիմա ասենք՝ հա, հուշագիր ենք ստորագրում, կարող ա ուրիշ բան ուզեն։ Ուզում եք ընտրություններ անել, ցրեք խորհրդարանը, չեք ուզում անել, ասեք՝ չենք ուզում անել։ Բայց պահանջարկը, ձևավորված օրակարգը չի եղել ընտրություններ անել – չանելու շուրջ»,- լրագրողների հետ զրույցում մանրամասնեց ԼՀԿ ղեկավարը։
Մարուքյանը խորհուրդ տվեց վերջիններին լուրջ չընդունել նախօրեի հայտարարությունը, քանի որ արտահերթ ընտրություններ լինելու են և իրենք մասնակցելու են այդ ընտրություններին։ Մնացածը կեղծ օրակարգեր են, որոնք իշխանության կողմից դրվում են շրջանառության մեջ, հետո՝ հանվում․
«Ընտրություններն անկտրել ձմերուկի պես բան են, չգիտես ինչ արդյունք կլինի։ Ես կարծում եմ՝ իշխանությունը ի սկզբանե չի ունեցել մտադրություն արտահերթ ընտրություններ անելու։ Հարց է դրել շրջանառության մեջ, շրջանառվել ա, հիմա հարցը հանում ա, կամ չի հանում, թողում է շրջանառության մեջ։ Այսինքն՝ անդադար քաղաքական դաշտը կմնա տուրբուլենտ, մարդիկ անընդհատ կպատրաստվեն ընտրություններին, իսկ ընտրությունները կարող են լինել 2020 թվականին»։
Քրիստինե Հովսեփյան
