«Վշտից» նախարար դարձաք ու հիմա ուզո՞ւմ եք ունենալ գրպանային ռեկտորներ. պատգամավորը՝ ԿԳՄՍ նախարարին

ԱԺ-ում «Բարձրագույն կրթության եւ գիտության մասին» օրենքի նախագծի քննարկման ժամանակ անկախ պատգամավոր Թագուհի Թովմասյանը մեջբերեց ԿԳՄՍ նախարարի ելույթից մի հատված, որտեղ նա ասում է. «Ցավոք սրտի նախորդ իշխանությունները բերեցին մի խորհրդի նախագահ, մի բդեշխ, որ կարող էր թելադրել համալսարանում օրակարգ, ռեկտոր, պրոռեկտոր նշանակել»:

-Հիմա ի՞նչ է ստացվում. Մի բդեշխին փոխարինում ենք մի ուրիշ բդեշխո՞վ: Ստացվում է, որ նախկին բոլոր արատավոր պրակտիկան, որ կիրառվել է, հիմա նորացված կիրառում ենք: Հետհեղափոխական Հայաստանում այս սկզբունքները պետք է իսպառ բացառվեն եւ այն, որ այս ընթացքում ԵՊՀ ռեկտոր չի հաջողվել նշանակել որեւէ մեկին, այդ թվում նաեւ ձեզ, պարոն նախարար, թեեւ կառավարությունը դրա ցանկությունը բազմիցս բուռն դրսեւորեց, բայց դուք  «վշտից» նախարար դարձաք ու հիմա ուզում եք ունենալ գրպանային ռեկտորնե՞ր: Սա անթույլատրելի է: Խնդրում եմ ձեզ, այս ամբիոնից խոստացեք, որ բուհերը քաղաքականացնելու եւ գրպարային ռեկտորներ ունենալու ձեր մտադրությունից հրաժարվելու եք,-իր խոսքն ամփոփեց պատգամավորը: