Կառավարման խորհուրդների առաջարկվող 5+4 ձևաչափը վտանգում է բուհի ինքնավարությունը․ Անի Սամսոնյան

Այսօր ԱԺ-ում ԿԳՄՍ նախարար Վահրամ Դումանյանը ներկայացրեց «Բարձրագույն կրթության եւ գիտության մասին» օրենքի նախագիծը, որով առաջարկում է բուհերի կառավարման խորհուրդները ձեւավորել 9 հոգանոց կազմով, որից 5-ը կլինեն կառավարության եւ լիազոր մարմնի կողմից նշանակված, 4-ը՝ դասախոսներ կամ ուսանողներ: Գործող օրենքի համաձայն կառավարման խորհուրդները բաղկացած էին 24 կամ 32 ներկայացուցիչներից:

ԿԳՄՍ նախարարին հարց ուղղեց «Լուսավոր Հայաստան» խմբակցության պատգամավոր Անի Սամսոնյանը, թե կառավարման խորհուրդները ինչու պետք է լինեն հենց 9  հոգանաց կազմով եւ արդյոք՝ գերակշիռ մաս կազմող լիազոր մարմնի եւ  կառավարության ներկայացուցիչները կկարողանան ապահովել բուհի ինքնավար կառավարումը:

ԿԳՄՍ նախարար Վահրամ Դումանյանը նշեց, որ 9 թիվը շատ բարդ է հիմնավորել, ինչպես, օրինակ, շատ բարդ է գիտականորեն հիմնավորել ԱԺ պատգամավորների սահմանված թիվը:

«Կարող եմ ասել ՝ թե ինչն է դրդել վերանայել թվերը եւ կրճատել այն. այսօրվա գործող կազմից շատ բարդ է ապահովել 50 տոկոս հիմնադիրի եւ լիազոր մարմնի ներկայացուցիչ, որովհետեւ մեր բուհերի քանակը բավականին մեծ է: Իսկ մեր փոքրիկ հանրապետության համար «ճոխություն» է այդքան բուհ ունենալը: Իմ անձնական տեսակետից եթե ասեմ, իրականում լավ լիներ, որ լիներ 9/0: Եթե բուհի հիմնադիրը պետությունն է, պետությունը պետք է կրի 100 տոկոս պատասխանատվություն բուհի գործունեության համար, սակայն հաշվի առնելով բազում հանգամանքներ՝ այդ որոշումը բացարձակ ընկալելի չէր լինի մեր հանրության կողմից» ,- ասաց նախարարը:

Սամսոնյանին չբավարարեց նախարարի պատասխանը և նա նշեց, որ այս փոփոխությամբ ակադեմիական շրջանակին տրված է շատ սահմանափակ ներկայացվածություն, ինչը ոտնահարում է բուհերի ինքնավարության սահմանադրական իրավունքը:

«Շատ պարզ հաշվարկ է արվել. կառավարման խորհրդում ունենալ հնարավորինս շատ մարդիկ լիազոր մարմնի և կառավարության կողմից» ,- ընդծեց Անի Սամսոնյանը: