Բնակարանների առուվաճառքի գործարքների նվազում, Երևանում գների բարձրացում. ինչ միտումներ են նկատվել 2020-ին

Հայաստանում 2020-ին՝ համավարակի և պատերազմի տարում, նվազել են բազմաբնակարան շենքերի բնակարանների առուվաճառքի գործարքները, զուգահեռ Երևանում ավելացել են դրանց միջին գները: «Արմենպրես»-ի հաղորդմամբ՝ այս մասին են վկայում ՀՀ վիճակագրական կոմիտեի հրապարակած տվյալները:

2020-ին եղել է բազմաբնակարան շենքերի բնակարանների օտարման 17 հազար 99 գործարք՝ 2019-ի 24 հազար 131 գործարքի համեմատ: Ընդ որում 2020-ին գրանցվել է բազմաբնակարան շենքերի բնակարանների առուվաճառքի 12 հազար 635 գործարք՝ 2019-ի 17 հազար 452-ի համեմատ:

Ընդ որում, Երևանում բոլոր վարչական շրջաններում 1 քմ մակերեսի հաշվարկով բազմաբնակարան շենքերի բնակարանների շուկայական միջին գներն ավելի բարձր են եղել, քան 2019-ին: Օրինակ, Կենտրոնում 1 քմ մակերեսի հաշվարկով շուկայական միջին գինը եղել է 644 հազար 800 դրամ՝ 2019-ի 607 հազար 400-ի նկատմամբ, Դավթաշենում 2020-ին եղել է 313 հազար 600՝ 2019-ի 286 հազար 100-ի նկատմամբ:

Նվազել է նաև բնակելի տների օտարման գործարքների թիվը: 2020-ին բնակելի տների օտարման 10 հազար 895 գործարք է գրանցվել՝ 2019-ի 12 հազար 782 գործարքի դիմաց: Ընդ որում, բնակելի տների առուվաճառքի գործարքները 2020-ին եղել են 7133, իսկ 2019-ին՝ 7 815:

Նվազել են նաև արտադրական նշանակության օբյեկտների օտարումների քանակը եղել է 769՝ 2019-ի 795-ի համեմատ: Արտադրական նշանակության օբյեկտների առուվաճառքի գործարքները 2020-ին եղել են 631, իսկ 2019-ին՝ 652:

Սակայն ավելացել են հողերի՝ այդ թվում գյուղատնտեսական նշանակության հողերի առուվաճառքի գործարքները: 2020-ին գրանցվել է առուվաճառքի 21 հազար 464 գործարք, 2019-ին՝ 20 հազար 612-ի նկատմամբ:

Ընդհանուր առմամբ անշարժ գույքի նկատմամբ 2020-ին իրականացվել է օտարման 60 հազար 253 գործարք, իսկ 2019-ին՝ 71 հազար 135 գործարք: Անշարժ գույքի առուվաճառքի գործարքները 2020-ին եղել են 46 հազար 159, իսկ 2019-ին՝ 51 հազար 508: Նվազել են նաև անշարժ գույքի նվիրատվության գործարքները: Սակայն ավելացել են անշարժ գույքի փոխանակման գործարքները: 2020-ին իրականացվել է անշարժ գույքի փոխանակման 245 գործարք, իսկ 2019-ին՝ 215: 2020-ին անշարժ գույքի առուվաճառքի ամենաշատ գործարքները գրանցվել են Երևանում՝ 13 հազար 899, այնուհետև Կոտայքում՝ 8 հազար 810 և Արարատի մարզում՝ 5 հազար 255:

Անշարժ գույքի նկատմամբ իրականացված վարձակալության գործարքները 2020-ին կազմել են 10 հազար 707, իսկ 2019-ին՝ 12 հազար 178: 2020-ին ամենաշատ վարձակալության գործարքներ իրականացվել են հասարակական նշանակության շինությունների նկատմամբ՝ 3884: