Մակրոնի հայտարարություններն անընդունելի են. Թուրքիայի ԱԳՆ

Թուրքիայի արտգործնախարարության մամուլի խոսնակ Համի Աքսոյը գրավոր հայտարարությամբ անդրադարձել է Ֆրանսիայի նախագահ Էմանուել Մակրոնի՝ Թուրքիայի վերաբերյալ արած հայտարարություններին, գրում է ermenihaber-ը:

Մակրոնը «France 5» հեռուստաընկերությանը տված հարցազրույցում մտահոգություն էր հայտնել, որ Թուրքիան կփորձի ազդել երկրում 2022թ. կայանալիք ընտրությունների արդյունքների վրա: Նա նաև հայտնել էր, որ 2020թ. աշնանը երկու երկրների միջև քաղաքական լարվածության ժամանակ թուրքական պետությունը որդեգրել էր ստի քաղաքականությունը, որը տարածում էր իշխանամետ ԶԼՄ-ների միջոցով:

Աքսոյն անընդունելի է համարել Ֆրանսիայի նախագահի հայտարարությունները ԵՄ գագաթաժողովից առաջ արված հարցազրույցում: Նրա համոզմամբ, դրանք դեմ են երկու երկրների բարեկամական և դաշնակցային հարաբերություններին:

«Թուրքիան թե՛ իր վարած տարածաշրջանային քաղաքականությամբ, թե՛ ԵՄ անդամ երկրների հետ ձևավորած երկկողմ հարաբերություններով շարունակելու է ազդեցություն և ամենամեծ ավանդն ունենալ Եվրոպական մայրցամաքում, ՆԱՏՕ-ում ու անդրատլանտյան հարաբերություններում»,-նկատել է խոսնակը:

Ինչ վերաբերում է Մակրոնի այն հայտարարությանը, որ Թուրքիան Ֆրանսիայում կայանալիք ընտրություններում «իր ազդեցությունն է ունենալու հասարակական կարծիքի վրա», Աքսոյն ասել է. «Այդ երկրում մոտ 800 հազարից ավել թուրք է ապրում, և հասարակության բարօրությունից ու ներդաշնակությունից բացի՝ Անկրան որևէ օրակարգ չունի Ֆրանսիայի ներքին քաղաքականության մեջ»: