Սպասվող ընտրությունները պատմական և ճակատագրական են, և մենք չենք կարող գնալ ընտրությունների՝ առանց գնահատական տալու, թե ինչ է տեղի ունեցել մեր երկրի հետ 1998-2018 թվականներին, ինչպես են երկրի ղեկավարները զավթել մեր պետությունը: Այդ մասին խորհրդարանում՝ ԸՕ փոփոխությունների նախագծի՝ երկրորդ ընթերցմամբ քննարկմանն ասաց անկախ պատգամավոր Արման Բաբաջանյանը:
Նրա խոսքով՝ ուսումնասիրությունները ցույց են տալիս, որ 98-ի ընտրությունների երկրորդ փուլից մինչև 2018-ի դեկտեմբերի 9-ի արտահերթ՝ ամբողջ համապետական ընտրությունների պատկերը ցույց է տալիս, որ նախորդ ռեժիմի՝ ՀՀԿ-ի օգտին հավաքագրվել է 350-400 հազար քվե, և, ըստ նրա, հենց այդ միջոցով հավերժացվել է այդ ռեժիմի կյանքը:
«Այս ԱԺ-ն մինչև ինքնալուծարվելը պետք է անդրադառնա 25 տարվա պետության զավթմանը, տա իրավաքաղաքական գնահատական: Այդ գնահատականը կորոշակիացնի մեր պետության թշնամիների շրջանակը, մենք կարձանագրենք, որ երկրի շատ կոնկրետ առաջնորդներ, կոալիցիայի մաս կազմած կուսակցություններ, ընտրական հանձնաժողովներ, դատախազություն, դատարաններ, Սահմանադրական դատարան ինչպես են ներգրավվել և մասնակցել պետության զավթմանը»,- ասաց պատգամավորը:
