Пир во время ….

Մարդ էնպես հարսանիք պետք է անի, որ մի ամբողջ ազգ՝ Հայաստան-Սփյուռք-Արցախ եռամիասնությամբ, երկիրը պատուհասած աղետը թողած, մենակ էտ մասին խոսի ու քննարկի։ ԲՀԿ առաջնորդ Գագիկ Ծառուկյանի որդու շքեղաշուք, դարակազմիկ հարսանիքը ևս մեկ անգամ փաստեց՝ «Ծառուկյանը գերհզոր մարդ է», «շրջապատի մարդ է», «հսկայական կարողության տեր» մարդ է ու նրա կազմակերպած հարսանիքներն էլ իրենց ճոխությամբ ոչ թե հավասարազոր են, այլ գերազանցում են աշխարհի երևելիների տոնած և դեռ տոնվելիք ամուսնական հանդիսությունները։ Ոմանք կասեն չտեսության ցուցադրություն, ոմանք էլ միաբերան կպնդեն՝ «դե, հզոր ա էլի Ծառուկյանը»։

Արդեն համացանցում տարածվել են արարողության ամենագեղեցիկ պահերը, ավելին՝ արդեն հասարակությունը մանրամասն տեղեկացվել է, թե քանի մարդ է մասնակցել արարողությանը,  հանդիսավարներին ու հրավիրված երգիչներին որքան գումար է վճարել «խոշոր սեփականատերը»։ Էլ չասենք, որ բոլորին մինչև հոգու խորքը ցնցել ու շլացրել է կես ժամանոց հրավառությունը և հսկայական տորթը։ Ինչպես ասում են՝ ամեն ինչ համապատասխանում է «Գագիկ Ծառուկյան անձնավորության» մասշտաբներին, իսկ «բարի մարդը» ո՛չ կաշկանդվելու, ո՛չ էլ իր ժողովրդից թաքցնելու բան ունի։

Սգակիր ժողովրդի կողքին միշտ սարի պես կանգնած կուսակցապետը դիսկոմֆորտ չի զգում այն մտքից, որ երկիրը գտնվում է տնտեսական ճգնաժամի  նախաշեմին և դեռ շարունակում են հողին հանձնել 44-օրյա պատերազմում նահատակված մեր հերոսներին, ինչի մասին այդքան սիրում են ճամարտակել և կուրծք ծեծել «Բարգավաճ Հայաստան» խմբակցության առաջամարտիկները։

Դիցուք, Ծառուկյանի հնարավորությունները լայն են՝ և՛ հուժկու հանրահավաքներ է կազմակերպում, և՛ հուժկու հարսանիքներ։ «Հայրենիք-հայրենասիրություն-հայրենիքի փրկություն» գեղեցիկ ու վեհ գաղափարներ են, որոնցից կարելի է անսահմանափակ խոսել տեսախցիկների առաջ, բայց յոթ օր, յոթ գիշեր հարսանիք անելուց էլ պետք չի հրաժարվել, քանզի որդուդ կյանքում մեկ անգամ ես ամուսնացնում և պետք է էնպես տոնես, որ աշխարհը թնդա։ Իսկ Գագիկ Ծառուկյանի խիղճը մաքուր է՝ «Զինծառայողների ապահովագրության» հիմնադրամին վերջերս փոխանցված 100 մլն դրամը վկա։

Քրիստինե Հովսեփյան