Հայաստանի առողջապահական բյուջեն վերջին 2-3 տարվա ընթացքում 30 տոկոս աճ է գրանցել. նախարար

Ճգնաժամային կառավարմանը զուգահեռ, իրականացվել են մեր բոլոր ծրագրային պարտավորությունները, հայտարարեց ՀՀ առողջապահության նախարար Անահիտ Ավանեսյանը Կառավարության ծրագրի 2020 թ. կատարման արդյունքների մասին զեկույցի քննարկմանը:

Նախարարի խոսքով՝ վերջին 2-3 տարվա ընթացքում Հայաստանի առողջապահական բյուջեն 30 տոկոս աճ է գրանցել: «Սա նշանակում է, որ ավելացել են շահառուների խմբերը, նաև՝ ներմուծվել են նոր ծառայություններ»,- ասաց Ավանեսյանը՝ հիշեցնելով, որ մինչև 18 տարեկան երեխաների բուժօգնությունն իրականացվում է պետության հաշվին: «Մի շարք հիվանդությունների բուժումը, վիրահատությունները, որ մեր քաղաքացիների համար անհասանելի էին, այսօր հասանելի են: Մեր առաջին և երկրորդ կարգի հաշմանդամներն ունենում են վիրահատության կարիք, որ արժեն 3-4 մլն դրամ: Մի քանի տարի առաջ դրանք անհաս երազանք էին, որ նրանք կարող են իրենց թույլ տալ, այսօր հասանելի են մեր քաղաքացիներին》,֊նշեց նախարարը։

Նախարարը նաև տեղեկացրեց, որ մարզային կարողությունները զարգացնելու առումով իրականացվել են խոշոր ներդրումներ, բուժհաստատությունները զինվել են նոր սարքավորումներով: «Բժշկական կենտրոնների հզորացման ներդրումները շարունակվելու են»,- վստահեցրեց նա: