Նախկին ԲՀԿ-ական և ներկայում անկախ պատգամավոր Գևորգ Պետրոսյանն այսօր շտապել էր ՔԿ՝ սատարելու բերման ենթարկված սյունեցիներին և նախօրեի միջադեպի վերաբերյալ տեսախցիկների առաջ իր «հեղինակավոր» կարծիքն արտահայտելու համար։ Ակնհայտ է, որ երեկվա կատարվածը Պետրոսյանի սրտով է․
«Սյունիքը կոտրվող չի, ինքը որոշել էր կոտրել Սյունիքը։ Հենց Սյունիքը կոտրեր, մնացածը իր համար լինելու էր խաղ ու պար։ Ես սյունեցիների ցավը տանեմ, հալալ արին»,- իր գոհունակությունն արտահայտեց պատգամավորը՝ անդրադառնալով Նիկոլ Փաշինյանի՝ մարզ կատարած այցի պատճառներին։
Պատգամավորը ոչ միայն չի դատապարտում ակցիայի մասնակիցների ագրեսիվ պահվածքն ու հայհոյախառն վանկարկումները, որ արվում էին կանանց և երեխաների ներկայությամբ, միաժամանակ, ուղիղ եթերում, այլ նաև հիացած է տեղի ունեցածով։
Հատկանշական է, որ Գևորգ Պետրոսյանը Սյունիքի քաղաքապետերին անձամբ չի ճանաչում, բայց մեծագույն հարգանք է տածում նրանց նկատմամբ՝ որպես արժանապատիվ պաշտոնյաների։ Վերջինիս խոսքով՝ հավաքը եղել է ինքնաբուխ, իսկ համայնքապետը պատասխանատու չէ համաքաղաքացիների վարքագծի համար։
«Այո՛, ես սատարում եմ էն մարդկանց, ում հիմա կանչել են ստեղ, ես դա գնահատում եմ որպես քաղաքական հետապնդում, բացառապես քաղաքական հետապնդում»,- եզրափակեց Գևորգ Պետրոսյանը։
Քրիստինե Հովսեփյան
