«Որոշել եմ արտահերթ խորհրդարանական ընտրություններին մասնակցել «Վերծնվող Հայաստան» կուսակցության հետ». այսօր ԱԺ-ում լրագրողների հետ զրույցում հայտարարեց «Իմ քայլը» խմբակցությունը լքած պատգամավոր Աննա Գրիգորյանը:
Հարցին՝ իր կարծիքով կուսակցությունը շանսեր ունի՞ խորհրդարան անցնելու, Գրիգորյանը շեշտեց՝ լավ աշխատանքի արդյունքում շանսեր ունեն:
Լրագրողների պնդմամբ՝ «Վերածնվող Հայաստան» կուսակցությունը դաշինք է կազմելու Ռոբերտ Քոչարյանի հետ, և հարցին՝ ճի՞շտ են տեղեկությունները, որ նա լինելու է դաշինքի երրորդ համարը, Աննա Գրիգորյանը նշեց, որ դեռևս վերջնական որոշում չկա.
«Այս պահին կան կոնսուլտացիաներ: Առնվազն տարօրինակ է, որ այդպիսի պնդում կարելի է անել: Եթե վերջնական որոշում լինի, առաջիկայում հայտարարություն կլինի»:
Գրիգորյանը նշեց, որ ինքը չի եղել «Քաղաքացիական պայմանագիր» կուսակցության անդամ, առաջադրվել է «Իմ քայլ»-ի ցուցակով, 2018 թվականի դեկտեմբերի 9-ից հետո ոչ մի կապ չի ունեցել քաղաքական թիմի հետ:
«Այստեղ եմ հայտնվել, որովհետև սյունեցիները ինձ ձայներ են տվել: Հետևաբար ինձ ասել, որ ես եղել եմ այս թիմի մաս, ճիշտ չէ»,-ասաց Գրիգորյանը:
