ՀՀ ԱԺ-ն երկրորդ ընթերցմամբ քննարկում է «Ժամկետային զինվորական կամ այլընտրանքային ծառայության հերթական զորակոչից, վարժական հավաքից կամ զորահավաքային զորակոչից խուսափած անձանց նկատմամբ համաներում հայտարարելու մասին» օրենքի լրամշակված նախագիծը:
Արդարադատության նախարարի տեղակալ Արմեն Հովհաննիսյանի խոսքով՝ նախագծով նախատեսվում է համաներում հայտարարել օրենքը ուժի մեջ մտնելու օրվա դրությամբ 27 տարին լրացած շարքային և 35 տարին լրացած պահեստազորի սպայական կազմերի պարտադիր զինվորական կամ այլընտրանքային ծառայությունից խուսափած և ՀՀ քրեական օրենսգրքի 327-րդ հոդվածի 1-ին և 3-րդ մասերով նախատեսված հանցագործություն կատարելու մեջ կասկածվող, մեղադրվող կամ դատապարտված արական սեռի քաղաքացիների նկատմամբ:
Նոր փոփոխությամբ համաներումը չի կիրառվելու վարժական հավաքից կամ զորահավաքային զորակոչից խուսափած անձանց նկատմամբ, այսինքն՝ 2020-ի սեպտեմբերի 27-ին հայտարարված զորակոչից խուսափած անձանց նկատմամբ: Ըստ այդմ՝ օրենքի նախագծի անվանումից հանվել է «….վարժական հավաքից կամ զորահավաքային զորակոչից խուսափած անձանց նկատմամբ համաներում հայտարարելու…» նախադասությունը:
Համաներումը, ըստ փոխնախարարի, չի կիրառվի նախագահի կողմից ներում շնորհելուց կամ համաներումից հետո կատարված 327-րդ հոդվածի 1-ին և 3-րդ մասերով նախատեսված հանցանքի դեպքում:
Համաներումը կկիրառվի նաև այն անձանց նկատմամբ, որոնք հանցագործությունների կամ դատավճիռների համակցության կանոններով կարող են մեղադրվել, մեղադրվում կամ դատապարտվել են նաև ՀՀ քրեական օրենսգրքի այլ հոդվածով:
ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը նշեց, որ արտերկրում գտնվող ՀՀ քաղաքացիները օրենքի ընդունումից հետո 7-ամսյա ժամկետում կարող են վերադառնալ Հայաստան և մասնակից լինել մեր երկրի խնդիրների լուծմանը:
