Շնորհակալություն ենք հայտնում Լատվիայի բոլոր քաղաքական ուժերին. Անուշ Բեղլոյան

«Իմ քայլը» խմբակցության պատգամավոր Անուշ Բեղլոյանը, ԱԺ-ում անդրադառնալով երեկ Լատվիայի կողմից պաշտոնապես Հայոց ցեղասպանության ճանաչմանն ու դատապարտմանը, ասաց, որ այդ գործընթացը տեղի է ունեցել 2018 թվականից սկսած և արդյունք է շատ քաղաքական գործիչների, հայ ժողովրդի բարեկամների, կուսակցությունների, Լատվիայում ՀՀ դեսպանության հետևողական աշխատանքի:

Պատգամավորը՝ որպես Հայաստան-Լատվիա բարեկամական խմբի ղեկավար, առանձնահատուկ շնորհակալություն հայտնեց իր գործընկեր՝ Լատվիա-Հայաստան բարեկամական խմբի ղեկավար Մարիա Գոլուբևային, որը նույնպես մեծ աջակցություն է ցուցաբերել այդ բանաձևի և հայտարարության ընդունման գործում:

«Շնորհակալություն ենք հայտնում Լատվիայի բոլոր քաղաքական ուժերին, պատգամավորներին, որոնք քվեարկել են հայ ժողովրդի համար կարևորագույն այս հարցի՝ Լատվիայում հանգուցալուծում ստանալու օգտին»,- ասաց պատգամավորը: Պատգամավորը ընթերցեց Լատվիայի Հանրապետության Սաեյմայի կողմից Օսմանյան կայսրության ժամանակաշրջանում իրականացված Հայոց ցեղասպանության վերաբերյալ հայտարարությունը, որում ասվում է. «Լատվիայի Հանրապետության Սաեյման՝ նշելով, որ կարևոր է ոգեկոչել Օսմանյան կայսրության իշխանությունների կողմից կազմակերպված Հայոց ցեղասպանության զոհերի հիշատակը, այն զանգվածային սպանդը և պարտադրված տեղահանությունները, որոնք սկսվեցին 1915 թ․ ապրիլի 24-ին նախկին Կոստանդնուպոլսի հայ համայնքի մտավորականների ու ականավոր անհատների ձերբակալություններով: Հաշվի առնելով ՄԱԿ-ի Ցեղասպանության հանցագործությունը կանխելու և դրա համար պատժի մասին կոնվենցիան և Եվրոպական խորհրդարանի 1987 թ․ հունիսի 18-ի բանաձևը, որը նշում է, որ այս դեպքերը, համաձայն Ցեղասպանության հանցագործությունը կանխելու և դրա համար պատժի մասին կոնվենցիայի հանդիսանում են ցեղասպանություն, ընդգծելով, որ Լատվիան դատապարտում է մարդկության դեմ գործած բոլոր հանցագործությունները և որ Լատվիան գիտակցում է այդ հանցագործությունները ճանաչելու և հիշելու իր պարտավորությունը՝ դրանց կրկնությունը կանխարգելելու նպատակով, ճանաչելով, որ Օսմանյան իշխանությունների գործողությունների հետևանքով հայ ժողովրդի մի ստվար քանակություն արտաքսվել է կայսրության այլ հատվածներ, որը բազմաթիվ զոհերի պատճառ է հանդիսացել՝ սովահարության, դաժանությունների և սպանդի գործադրմամբ: Դատապարտում է այն հանցագործությունները, սպանդը և բռնի տեղահանությունը, որոնք իրագործվել են Օսմանյան իշխանությունների կողմից հայ ժողովրդի նկատմամբ, հարգում է Հայոց ցեղասպանության բոլոր զոհերի հիշատակը և հարգանքի տուրք է մատուցում բոլոր փրկվածներին: Հաստատում է, որ պատմական հարցերի շուրջ բաց և ազատ քննարկումները անքակտելիորեն կապված են առողջ և հասուն ժողովրդավարության զարգացման հետ: Կոչ է անում միջազգային հանրությանը գնահատական տալ այս պատմական իրադարձություններին և նայել դեպի այն ապագան, որը ցանկանում ենք կառուցել՝ առանց բռնության և անհանդուրժողականության, ապագա, որտեղ մարդու իրավունքները հարգվում են, և յուրաքանչյուր անհատ կարող է լինել ազատ, անվտանգ և ապահով»։