Ադրբեջանի արտաքին գործերի նախարարությունը երկու երկրների սահմանին տիրող իրավիճակի հետ կապված՝ Հավաքական անվտանգության պայմանագրի կազմակերպությանը (ՀԱՊԿ) Հայաստանի ղեկավարության դիմումը համարում է խնդրի քաղաքականացման փորձ: Այս մասին, ըստ ТАСС-ի, այսօր հայտարարել է Ադրբեջանի արտաքին գործերի նախարար Ջեյհուն Բայրամովը՝ տաջիկ գործընկեր Սիրոջիդդին Մուհրիդինի հետ հեռախոսազրույցում:
«Նախարար Ջեյհուն Բայրամովը ՀԱՊԿ ներկայիս նախագահ Տաջիկստանի արտաքին գործերի նախարարի ուշադրությունը հրավիրեց այն բանի վրա, որ Հայաստանի դիմումը Հավաքական անվտանգության պայմանագրի կազմակերպությանը ադրբեջանա-հայկական սահմանի հարցով ոչ այլ ինչ է, քան Հայաստանի ղեկավար շրջանակների կողմից խնդիրը քաղաքականացնելու փորձ»,-ասված է հաղորդագրության մեջ:
Բայրամովը Տաջիկստանի իր գործընկերոջը հայտնել է, որ Ադրբեջանի պետական սահմանապահ ծառայության ղեկավարությունն անմիջապես ուղարկվել է դեպքի վայր, որտեղ բանակցություններ են վարվել հայ սահմանապահների հետ:
«Ադրբեջանի ԱԳՆ ղեկավարը շեշտել է, որ նման միջադեպերը պետք է լուծվեն քաղաքական մեթոդներով և բանակցությունների միջոցով», – ասվում է հաղորդագրության մեջ:
