Մարուքյանի խոսքով՝ ստեղծված իրավիճակում Արա Այվազյանի հրաժարականը սխալ է

 ՀՀ ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը կոչ է անում պաշտոնակատար անձանց գիտակցել, որ երկիրը գտնվում է ծանր վիճակում և այս ստեղծված իրավիճակում ցանկացած նախարարի պաշտոնակատարի հրաժարական սխալ է համարում, քանի որ Հայաստանը գտնվում է ծայրահեղ ծանր վիճակում:

Մարուքյանն այս մասին ասաց ԱԺ ճեպազրույցում՝ անդրադառնալով հարցին, թե ԱԳ նախարարի պաշտոնակատարի պաշտոնից հրաժարական ներկայացրած Արա Այվազյանի հետ կապված որևէ տարաձայնություն եղե՞լ է Անվտանգության խորհրդի նիստում:

«Ընդհանրապես խոսակցություն չի եղել իր հետ կապված: Այն հատվածը, որն իր հետ կապված էր, երբ վարչապետի պաշտոնակատարն ասում էր, որ ԱԳ նախարարին հանձնարարել է, ԱԳ նախարարն էլ գլխով էր անում, ուղիղ եթերում կա: Մնացած մասով որևէ բան չի եղել: Եվ ես զարմացած էի, որ հետո իմացա, որ հրաժարական է տվել․․․Ժամանակավոր պաշտոնակատարների կառավարությունը և սահմանադրաիրավական կարգավորումները թույլ չեն տալիս որևէ հրաժարական տված նախարարի փոխարեն նշանակել նոր նախարար: Եվ նախարարի հրաժարականը, և ցանկացած այլ նախարարի հրաժարականն այս իրավիճակում մեր երկիրը կարող է դնել շատ բարդ վիճակում»,-ասաց Մարուքյանը:

Նա կարծում է, որ ճիշտը հանրապետությանը ծառայել շարունակելն է, ոչ թե ամենածանր պահին դուրս գալ և այդ բեռը թողնել օդում: