ՀՀ վարչապետի պաշտոնակատար, «Քաղաքացիական պայմանագիր» կուսակցության նախընտրական ցուցակը գլխավորող Նիկոլ Փաշինյանը Փարաքար համայնքում հանդիպմանն անդրադարձավ Ռոբերտ Քոչարյանի ու Սերժ Սարգսյանի հայտարարություններին: «Տեսեք՝ նրանց բառապաշարն ուր է արդեն հասել, արդեն սկսել են զենքի, չգիտեմ ինչի մասին խոսել, տերմինաբանությունը զարգացնում են: Թոթովախոս մեկը կա, վախենում է գա և բանավեճի մասնակցի, ասում է՝ ես մեծ հաճույքով դուելի կհրավիրեմ՝ զենքի ցանկացած տեսակով: Հիմա պատկերացրեք՝ վիճակը ինչքան է վատացել: Սա էլ գնահատական է նաև մեր իշխանությանը, որովհետև, ենթադրում եմ՝ տվյալ սուբյեկտը ստիպված է անձամբ զենք վերցնել, քանի որ Նաիրի Հունանյանը բանտում է գտնվում»,- ասաց նա:
Անդրադառնալով Սերժ Սարգսյանին՝ Փաշինյանը հայտարարեց. «Այն մյուսն ասում է՝ եթե ես լինեի գերագույն հրամանատար, ես ինքս ինձ կգնդակահարեի: Իսկ որ վերջին 10 տարվա զենք-զինամթերքի 75%-ը ձեռք է բերվել քեզնից հետո, բա ինչի՞ քեզ չես գնդակահարում դրա համար: Իսկ որ մոնտե կարլոների կազինոներում զինվորներից գողացված միլիոններ կրվեիր, քեզ կգնդակահարեի՞ր, թե՞ չէ, գլուխդ պատերին կտայի՞ր, թե՞ չէ…Հիմա էլ գալիս եք 200 հազար դոլարանոց սաֆարիներ եք վայելում, չգիտեմ ինչեր եք վայելում, հիմա էլ եկել ժողովրդին սպառնո՞ւմ եք: Նրանց ամբողջ իշխանավարումը եղել է ոչ այլ ինչ, քան սեփական ժողովրդին դուելի հրավիրելն ու գնդակահարելը: Նրանք 2008-ի մարտի 1-ին էլ են դուելի հրավիրել ու գնդակահարել՝ առանց հրավերի: Կամ այն մեկը, որ ասում է՝ ինքնասպան… Բա դու ազգային անվտանգության նախարար էիր, երկրի ԱԺ նախագահին, վարչապետին գնդակահարեցին, բա դրանից հետո քեզ խի՞ չգցեցիր պատուհանից: Կարո՞ղ է նրա համար, որ քո ղեկավարած կառույցը լավ էլ տեղյակ էր, որ նման բան է տեղի ունենում ու որևէ քայլ չէր ձեռնարկում՝ երկրի անվտանգությունն ապահովելու համար: Իսկ դա կարո՞ղ է նրա համար էր, որ Վազգեն Սարգսյանն ու Կարեն Դեմիրճյանը դեմ էին կանգնել Մեղրին Ադրբեջանին հանձնելու ծրագրին: Հենց Վազգեն Սարգսյանն ինքը վկայել է: Այսօր ասում են՝ ինչքանո՞վ է հիմնավոր»:
