Ընտրակաշառք տվողներին կլցնենք ծակերը, թող հանգստանան. Նիկոլ Փաշինյան

Այսօր Մասիս քաղաքում անցկացրած քարոզարշավի ընթացքում Նիկոլ Փաշինյանը քաղաքացիներին հորդորեց համագործակցել իրավապահների հետ և օգնել բացահայտել ընտրակաշառքի դեպքերը։

Նա նշեց, որ Արմավիրի և Գեղարքունիքի մարզերում կան ձերբակալության դեպքեր։

«Նրանք կալանքի տակ են, արժի ծափահարել: Ձերբակալվել են նաև ընտրակաշառք ստացողները, բայց քանի որ ընտրակաշառք ստացողները համագործակցել են իրավապահների հետ, մանրամասն ցուցմունքներ են տվել, նրանք ազատվել են քրեական պատասխանատվությունից»,-ասաց Փաշինյանը:

«Այս երկու օրը բոլոր ընտրակաշառք տվողներին կլցնենք ծակերը, որպեսզի այնտեղ  հանգստանան: Թավիշի ժամանակներն ավարտվում են, ժողովուրդ ջան: Այսօր կան, այսպես ասած, «ընտրատասովշիկներ», տարբեր պաշտոնյաներ, տեղական ինքնակառավարման մարմիններ, ովքեր իրենց վատ են պահել ու շարունակում են վատ պահել»,-ասաց Փաշինյանը՝ ցույց տալով ձեռքի մուրճը:

«Այս գործիքը գիտե՞ք ինչի համար է, սա ժանգոտ մեխերը հանելու համար է, հունիսի 21-ից անձամբ եմ զբաղվելու ժանգոտած մեխերով, այդ թվում այս մարզի: Դրա համար պետք է, որպեսզի հունիսի 20-ին գնաք ընտրատեղամասեր, վերցնեք քվեաթերթիկ համար 3-ը: Ես չեմ ասում, որ գնաք ու քվեարկեք մեր օգտին, ասում եմ գնացեք ու քվեարկեք ձեր օգտին»,-ասաց Փաշինյանը։