Բերել եմ 20 մլրդ դոլար վարկ` 1%-ով, որը չեն ընդունել. Գագիկ Ծառուկյան

Այսօր Արագածոտնի մարզում քարոզարշավի ժամանակ ԲՀԿ առաջնորդ, կուսակցության ցուցակը գլխավորող Գագիկ Ծառուկյանը հայտարարեց, որ մեր ժողովրդի վիճակը շատ ծանր է, պարտքերի, վարկերի, տոկոսների, տույժ տուգանքի տակ է, ուստի այս վիճակում հզոր պետություն չենք կարող ունենալ:

«Ես ասում եմ խնդիրը եւ դրա լուծումը: Կետ առ կետ կարող եմ ներկայացնել, ես դեռ քիչ եմ ասում, ավելի շատ կարող ենք անել: Այսօր Փաշինյանը ներկայացնում է, որ Ծառուկյանը ասում է ժողովրդին 2 մլն մարդու մինչև 3 մլն դրամ վարկերը ո՞նց կլինի, որ ներում շնորհեն՝ բանկերը կտրաքեն: Այո, եթե դա թողնենք բանկերի վրա, բանկերը կտրաքեն, և տնտեսությունը կավիրվի: Բայց ես չեմ ասել, որ այդ 3 մլն դրամները կմնան բանկերի վրա, ոլորտի զարգացման համար գումարներ պետք է բերենք:

Հեղափոխությունից հետո ես բերել եմ 20 մլրդ դոլար վարկ 1 տոկոսով, կարող եք Ջավադյանին (ԿԲ նախկին նախագահ) հարցնել, որը չեն ընդունել: Այն էլ 10 տարով, որ առաջին 2 տարին մայր գումար պետք է չվճարվեր, միայն տոկոսը պետք է տային: Առանց գումար բերելու տնտեսություն չի զարգանա, տնտեսությունը չի հզորանա, և չենք կարող ապահովել ո՛չ մեր հայրենիքի անվտանգությունը, և ո՛չ էլ տնտեսության զարգացումը, այլ գումար պետք է բերվի»,- ասաց Ծառուկյանը: