Սյունեցու կամքն ազատագրված է

Քարոզարշավի ավարտը մասնակից ուժերի համար «խաղաքարտերի» բացման ժամանակն է: Ավանդական դարձած մարզային այցելություններից ամենասպասվածն ու ինտրիգայինը Սյունիքի մարզն է, որը հետպատերազմյան շրջանում ակտիվորեն շահարկվում էր քաղաքական նպատակներով։ Ամիսներ առաջ վարչապետ Փաշինյանի աղմկահարույց այցը Սյունիք բաց հարցեր թողեց․ հասկանալի էր, որ իրենց ընդդիմություն որակած նախկին ղեկավարությունը Սյունիքում սեպարատիստական տրամադրությունների ապահովման համար պատրաստ է ամեն ինչի:

Այս բոլոր հանգամանքները բացատրում են «Հայաստան» դաշինքում Սյունիքի նախկին մարզպետ Վահե Հակոբյանի հայտնվելը և դաշինքի դեմքերից մեկը դառնալը: Սյունիքում ազդեցիկ ուժ ունենալը անչափ կարևոր ակտիվ է իշխանության ծարավ Ռոբերտ Քոչարյանի համար: Ամիսներ առաջ վարչապետի՝ Սյունիք կատարած այցի ժամանակ տեղի ունեցած խուլիգանությունները մինչ օրս հրճվանքի տեղիք են տալիս նախկին իշխանությունների ներկայացուցիչներին, ովքեր, չունենալով իրենց մեջքի ետևում ոչ մի դրական հիմք, ստիպված են հպարտանալ նման իրադարձություններով:

Ակներև է, որ վերջինները ակնհայտ սադրանքների պետք է գնային Փաշինյանի հաջորդ այցի ժամանակ: Փաշինյանի կողմից ղեկավարող ուժի մարզային այցը Սյունիք քարոզարշավի վերջին օրերին զինաթափեց  սխրանքների պատրաստվող «ընդդիմադիրներին», որոնք համայնքապետերի, այսպես կոչված՝ թաղային հեղինակությունների կամ այլ «տասովշիկների» օգնությամբ պետք է խոչընդոտեին սյունեցիներին մասնակցել Փաշինյանի հրավիրած հանրահավաքին, իսկ արդեն անձամբ իրենք՝ ամենավստահելիների հետ միասին, անցնեին ավելի կտրուկ գործողությունների՝ ընդհուպ մինչև ֆիզիկական սպառնալիքների կամ փողոցային լեքիսկոնի կիրառմամբ դիմավորել Փաշինյանին:

Սակայն Փաշինյանը, թողնելով Սյունիքը որպես քարոզարշավի եզրափակիչ մաս, խառնեց ընդդիմության բոլոր խաղաքարտերը: Մնացած բոլոր մարզերում ստանալով դրական ընդունելություն և հրավիրելով բազմամարդ հանրահավաք-երթեր՝ Փաշինյանը կոտրեց Սյունիքում սպառնալիքների շղթայով ձևավորված մթնոլորտը և սյունեցիներին վստահություն ներշնչեց սեփական ուժերի նկատմամբ: Բանը հասավ նրան, որ նույնիսկ նախորդ այցից հետո խուլիգանություններ կազմակերպելու մեջ ներգրավված Մեղրիի համայնքապետը, որը նաև «Հայաստան» դաշինքի ցուցակում է, ստիպված եղավ հայտարարել, որ իրենք չեն պատրաստվում դիմավորել Փաշինյանին՝ այդպիսով փորձելով քողարկել տապալված պլանը: Անկման վերջնակետ դարձավ Փաշինյանի ցույցերի բազմամարդությունը և խաղաղ մթնոլորտը, որն ուղեկցեց նրանց ամբողջ մարզով: Ցույցերին հետևում են նաև արդեն ավանդական դարձած քայլերթերը, որոնք իրենց սիմվոլիզմով հիշեցնում են 2018թ․ հեղափոխությունը:

Նշանակալից դարձավ նաև Գորիսում արված հայտարարությունը, որով Փաշինյանը հայտարարեց, որ ամսի 18-ին Հանրապետության Հրապարակում պլանավորված հանրահավաքը  տեղափոխվում է ամսի 17-ին: Հիշեցնեմ, որ ամսի 18-ին նշանակված էին և՛ «Քաղաքացիական Պայմանագրի», և թե՛ «Հայաստան» դաշինքի հանրահավաքները, ինչը բավականին ռիսկային էր և կար բախումների վտանգ, սակայն Փաշինյանը ինքն արեց առաջին քայլը իրավիճակի թուլացման համար՝  դարձյալ պատասխանատվությունն ընդունելով իր վրա։

Բագրատ Վարդանյան