«Հայաստան» դաշինքի առաջնորդ, երկրորդ նախագահ Ռոբերտ Քոչարյանի խոսքով` արտահերթ ընտրություններով երկրում ստեղծված ճգնաժամը չի կարգավորվել: Ավելին` նրա համոզմամբ` հավանաբար 1․5 տարի հետո լինելու են նոր արտահերթ ընտրություններ:
«Չէր կարող կարգավորվել, քանի որ նույն թիմը, որը պատճառ է հանդիսացել ճգնաժամի, մնացել է իշխանության գլխին: Ըստ էության, այն, ինչի համար կազմակերպվել են այս արտահերթ ընտրությունները, այդ նպատակին չեն ծառայել: Նույն իշխանական թիմը մնացել է իշխանության գլխին, ուրեմն ճգնաժամի պատճառը չի հաղթահարվել», – այսօր դաշինքի առաջին ընդհանուր ժողովի ժամանակ ասաց Քոչարյանը:
Ըստ նրա` պատերազմում պարտության, Շուշին ու Հադրութը կորցնելու, բազմաթիվ զոհեր ունենալու պատճառները բացահայտված չեն, և այս բոլոր հարցերի պատասխանների բացակայության դեպքում Հայաստանում հնարավոր չէ ապրել համերաշխ, ներքաղաքական կյանքի պայմաններում:
«Ըստ էության, մենք շարունակում ենք մնալ ճգնաժամի մեջ, և «Հայաստան» դաշինքն այն քաղաքական ուժն է, որը պայքարելու է այս ճգնաժամի վերջնական հաղթահարման համար», – հայտարարեց դաշինքի ղեկավարը` համոզմունք հայտնելով, որ այս իշխանությունները իրենց աշխատելաոճն ու կադրային բանկը չփոխելով` չեն կարող արդյունքի հասնել, իսկ դա բերելու է ևս մեկ արտահերթ ընտրությունների. «Իրենք չարացած են, շարունակելու են նոր հետապնդումներ, և համոզված եմ, որ դա պարտադիր բերելու է նոր արտահերթ ընտրությունների»:
