Պետական դավաճանության մեջ մեղադրվող ամուսինները՝ ամբաստանյալի աթոռին

Երեւան քաղաքի ընդհանուր իրավասության դատարանում՝ դատավոր Գագիկ Պողոսյանի  նախագահությամբ, այսօր շարունակեց պետական դավաճանության գործով դատական նիստը:

Այս գործով ամբաստանյալի աթոռին են հայտնվել ամուսիններ Մայիս Սահակյանն ու Ստելլա Սարգսյանը: Նրանցից միայն Մայիս Սահակյանն է գտնվում կալանքի տակ:

Այսօրվա նիստին գործով նոր պաշտպաններ ներգրավվեցին. մասնավորապես փաստաբաններ Ալեքսանդր Կոչուբաեւը եւ Աբգար Պողոսյանը դատարանում կներկայացնեն Ստելլա Սարգսյանի շահերը: Քանի որ նախաքննության փուլում իրենք ներգրավված չեն եղել, պաշտպան Կոչուբաեւը խնդրեց հետաձգել նիստը՝ նյութերին ծանոթանալու համար:

Մինչ այդ, սակայն, դատարանը ճշտեց ամբաստանյալների ինքնությունը: Ի պատասխան դատավորի հարցի՝ 23-ամյա Մայիս Սահակյանն ասաց՝ ՀՀ քաղաքացի է, ամուսնացած է, խնամքին ունի մեկ անչափահաս երեխա: «Աշխատել եմ «Էրեբունի Պլազայում»՝ ախրանայում»,- ասաց ամբաստանյալը:

Նրա կինը՝ 23-ամյա Ստելլա Սարգսյանն էլ ասաց՝ ունի թերի բարձրագույն կրթություն, չի աշխատում, դատավորի հարցին՝ առո՞ղջ եք, ամբաստանյալը պատասխանեց. «Այս դեպքերից հետո այդքան էլ առողջ չեմ»:

Այսպիսով՝ դատական նիստը հետաձգվեց եւ նշանակվեց սեպտեմբերի 28-ին:

Ըստ մեղադրանքի՝ Մայիս Սահակյանին մեղադրանք է առաջադրվել այն բանի համար, որ նա կնոջ՝ Ստելլա Սասունի Սարգսյանի օժանդակությամբ, լրտեսության, ռազմական բնագավառում պետական և ծառայողական գաղտնիքի շարքին դասվող տեղեկություններ հավաքելու ու հանձնելու, ինչպես նաև թշնամական գործունեություն իրականացնելու համար օտարերկրյա կազմակերպության ներկայացուցչին այլ օգնություն ցույց տալու եղանակով կատարել է պետական դավաճանություն՝ ի վնաս Հայաստանի Հանրապետության տարածքային անձեռնմխելիության և արտաքին անվտանգության:

ԱԱԾ-ի փոխանցմամբ՝ ամուսինները նախկինում գտնվել են Թուրքիայում: «Ձեռք են բերվել փաստական տվյալներ այն մասին, որ ՀՀ քաղաքացին նախկինում բազմիցս գտնվել է Թուրքիայում, որի ընթացքում արդեն հայտնվել է այդ երկրում գործունեություն ծավալած ադրբեջանական հետախուզական ծառայությունների տեսադաշտում և հավաքագրվել նշված կազմակերպության ներկայացուցչի կողմից: Այնուհետև վերադառնալով մշտական բնակության վայր՝ Հայաստանի քաղաքացին Թուրքիայում բնակվող իր ծանոթի միջոցով օտարերկրյա հետախուզության ծառայության աշխատակցին է փոխանցել իր բջջային հեռախոսահամարը»,- ասվում է ԱԱԾ հաղորդագրությունում։

Ըստ ԱԱԾ տվյալների՝ տեղի ունեցած հեռախոսազրույցների ընթացքում ՀՀ քաղաքացին համաձայնել է ի վնաս Հայաստանի և Արցախի տարածքային անձեռնմխելիության ու արտաքին անվտանգության տեղեկություններ տրամադրել թշնամական գործունեությամբ զբաղվող նշված կազմակերպության ներկայացուցչին։ Մասնավորապես՝ քաղաքացին զինված ուժերի, սպառազինությունների մասին պետական գաղտնիք կազմող տեղեկությունների դիմաց վարձատրվել է։

«ՀՀ քաղաքացին թշնամական գործունեություն իրականացնելու համար օտարերկրյա կազմակերպության ներկայացուցչին օգնություն ցույց տալու կապակցությամբ ծավալած հանցավոր գործունեության ընթացքում հավաքել է պետական և ծառայողական գաղտնիք կազմող տվյալներ, ինչպես նաև այլ բնույթի տեղեկություններ, որոնք ինչպես անձամբ, այնպես էլ կնոջ միջոցով օտարերկրյա հետախուզության ծառայության աշխատակցի հետ համացանցային կապի ընթացքում փոխանցել է վերջինիս և դրա դիմաց որպես վարձատրություն ստացել շուրջ 1500 դոլար գումար»,- հայտնում են ծառայությունից։

Armtimes.com