Հայաստանի Հանրապետության պետական պարգևների արժանացած անձինք եւ նրանց ընտանիքները ՀՀ օրենսդրությամբ սահմանված կարգով օգտվում են արտոնություններից։
Արցախյան 44-օրյա պատերազմի ժամանակ եւ դրանից հետո քանի՞ անձ է արժանացել ՀՀ պետական պարգևի, ի՞նչ արտոնություններից կարող են օգտվել նրանք և նրանց ընտանիքները:
Հարցմանն ի պատասխան՝ հայտնի է դառնում, որ 2020 թվականի 44-օրյա պատերազմի ժամանակ և դրանից հետո ՀՀ նախագահի պետական պարգևներով պարգևատրվել են 1359 զինծառայողներ, ազատամարտիկներ եւ կամավորականներ: Վերջիններս պարգեւատրվել են «Հայրենիքի», «Հայրենիքին մատուցած ծառայությունների համար» շքանշաններով, «Արիության», «Հայրենիքին մատուցած ծառայությունների համար» եւ «Մարտական ծառայության» մեդալներով:
Ինչ վերաբերում արտոնություններին, պաշտպանության նախարարությունից հաղորդեցին, որ պետական պարգևներ ստացած անձանցից ՀՀ ազգային հերոսներն ու «Մարտական խաչ» շքանշանով պարգեւատրված անձինք եւ նրանց ընտանիքները ստանում են ամենամասյա պարգևավճար:
Ըստ օրենքի՝ ՀՀ ազգային հերոսները ստանում են 150 հազար դրամ ամենամսյա պարգեւավճար, իսկ «Մարտական խաչ» շքանշանով պարգեւատրված անձինք՝ 15 հազար դրամ:
«Հայաստանի ազգային հերոս» բարձրագույն կոչմանը, Մարտական խաչ» շքանշանով հետմահու արժանացած անձանց ընտանիքներին տրվող պարգեւավճարներն են.
- ՀՀ պաշտպանության ժամանակ, ինչպես նաեւ ծառայողական կամ պաշտոնեական պարտականությունները կատարելիս զոհված՝ հետմահու «Հայաստանի ազգային հերոս» ՀՀ բարձրագույն կոչում ստացած անձի ընտանիքին տրվող պարգեւավճարի չափը սահմանված է 250 հազար դրամ
- ՀՀ պաշտպանության ժամանակ, ինչպես նաեւ ծառայողական կամ պաշտոնեական պարտականությունները կատարելիս զոհված՝ հետմահու առաջին աստիճանի «Մարտական խաչ» շքանշանով պարգեւատրված անձի ընտանիքին տրվող պարգեւավճարի չափը սահմանված է 150 հազար դրամ
- ՀՀ պաշտպանության ժամանակ, ինչպես նաեւ ծառայողական կամ պաշտոնեական պարտականությունները կատարելիս զոհված՝ հետմահու երկրորդ աստիճանի «Մարտական խաչ» շքանշանով պարգեւատրված անձի ընտանիքն տրվող պարգեւավճարի չափը սահմանված է 100 հազար դրամ:
