Վրաստանից դեպի Ռուսաստան կառուցվող միջանցքից կարող է օգտվել Հայաստանը

Հայաստանը կոմպակտ միջանցք կստանա Վրաստանի տարածքով Ռուսաստան իր բեռների փոխադրման համար։ Սակայն կա մի հանգամանք՝ Թբիլիսին պետք է ավարտի նախկինում սկսված և դեռևս չավարտված խոշոր տրանսպորտային նախագծերը:

Ռուսթավի-Ալգեթի ավտոմոբիլային ճանապարհի շինարարության ավարտը մինչև Հայաստանի սահման կկապի Երևանը E60 միջազգային արագընթաց մայրուղու հետ և թույլ կտա հայկական ապրանքներին ավելի արագ հասնել Ռուսաստան: Նման կարծիք է հայտնել Վրաստանի տրանսպորտային միջանցքի ուսումնասիրության կենտրոնի տնօրեն Պաատա Ցագարեիշվիլին::

Նրա գնահատմամբ՝ դա Երևանին թույլ կտա անուղղակիորեն դառնալ եվրոպական նախագծի՝ Արևելք-Արևմուտք միջազգային ավտոմայրուղու (e 60) մի մասը և կոմպակտ միջանցք ստանալ Վրաստանի տարածքով:

Ավելի վաղ այդ ծրագրի իրականացման կարևորության մասին ինչպես Վրաստանի, այնպես էլ Հայաստանի համար հայտարարել էր Վրաստանի տարածքային զարգացման և ենթակառուցվածքների նախարար Իրակլի Կարսելաձեն: Նրա խոսքով՝ Սադախլոյի ուղղությամբ Ռուսթավի-Ալգեթի ճանապարհի կառուցման նախագիծը բեկումնային կդառնա ինչպես Վրաստանի, այնպես էլ Հայաստանի համար:

Դարի նախագիծ

Արևելք-Արևմուտք ավտոմայրուղին կամ E-60 եվրոպական տարանցիկ ճանապարհը շատ հաճախ կոչվում է դարի նախագիծ: Մեծությամբ այն եվրոպական երկրորդ տարանցիկ միջանցքն է, որը սկսվում է Բրեստում (Ֆրանսիա) և ավարտվում է Իրքեշթամում (Ղրղզստան): Վրաստանում e-60-ը սկիզբ է առնում Ադրբեջանի հետ սահմանին և ավարտվում է Սև ծովի ափին՝ Փոթի նավահանգստի մոտ:

Վրաստանի տարածքում միջանցքի երկարությունը 392 կմ է, իսկ նրա «ճյուղերից» մեկը տանում է դեպի Հայաստանի հետ սահման։

Նախագծի իրականացման ժամկետները Վրաստանում երկու անգամ հետաձգվել են տարբեր պատճառներով։ Նրանցից մեկը դարձել է կորոնավիրուսի համաճարակը։ Հուլիսի սկզբին Թբիլիսին Եվրոպական ներդրումային բանկից (ԵՆԲ) 106,7 մլն եվրոյի չափով վարկ է ստացել դեպի Ադրբեջանի և Հայաստանի սահմաններ ճանապարհների կառուցման համար:

Ներկա ճանապարհների տեղում նախատեսվում է ստեղծել ժամանակակից և անվտանգ մայրուղի, որով կիրականացվեն բեռնատար և ուղևորափոխադրումներ։ Արդիականացման արդյունքում կբարձրանա երթևեկության անվտանգությունը, կնվազեն տրանսպորտային միջոցների ուղեվարձի և սպասարկման ծախսերը։

Նյութը ՝ Sputnik Արմենիա