Արդյունավետ կառավարմամբ հասնել մեր առջև դրված խնդիրների լուծմանը. Պավել Ցուգունյան

Սյունիքի մարզ կատարած աշխատանքային այցի շրջանակներում «Հայանտառ» ՊՈԱԿ տնօրեի ժամանակավոր պաշտոնակատար Պավել Ցուգունյանը հանդիպել է «Սյունիք» և «Կապան» անտառտնտեսությունների մասնաճյուղերի աշխատակիցներին, քննարկել է տնտեսություններում առկա խնդիրները, անտառվերականգման և անտառպահպանության ուղղությամբ իրականացվող աշխատանքների արդյունավետությունը, կառուցվածքային փոփոխություններն ու առաջիկա ծրագրերը: Մասնավորապես, Ցուգունյանն ընդգծել է վերջերս «Սյունիք» և «Կապան» մասնաճյուղերում կատարված կառուցվածքային փոփոխության անհրաժեշտությունը, համաձայն որի «Սյունիքի անտառտնտեսություն» մասնաճյուղից առանձնացվել և «Կապանի անտառտնտեսութուն» մասնաճյուղին է միացվել «Արծվանիկ» անտառպետությունը:

Ըստ Ցուգունյանի, փոփոխությունները պայմանավորված են, նախ և առաջ, անտառկառավարման ոլորտում արդյունավետության բարձրացմամբ: «Ինչպես գիտեք, անտառվերականգնումը և արդյունավետ անտառկառավարումը մեր ամենօրյա աշխատանքի հիմքն է, ինչի համար պետությունը հսկայական ռեսուրսներ է ծախսում, թե’ ֆինանսական, թե’ նյութատեխնիկական։ Առաջիկայում նույնպես սպասվում են բավականին լուրջ ներդրումներ ու ծրագրեր։ Մեր նպատակն է արդյունավետ կառավարել այս ամենը և հասնել մեր առջև դրված խնդիրների լուծմանը, ինչի համար անհրաժեշտ է իրականացնել նաև ճիշտ ինստիտուցիոնալ և կառուցվածքային փոփոխություններ», իր խոսքում նշել է Ցուգունյանը։ ՊՈԱԿ տնօրենի ժամանակավոր պաշտոնակատարը շրջել է նաև «Սյունիք» և «Կապան» անտառտնտեսությունների պահպանության վայրերում, տեղում ծանոթացել է անտառպահպանության աշխատանքններին, ինչպես նաև մասնակցել «Սյունիք» և «Կապան»անտառտնտեսություններում կառուցվածքային փոփոխություններով պայմանավորված՝ Արծվանիկ անտառպետության տարածքի և գույքի հանձման-ընդունման աշխատանքներին: