ՀՀ կառավարության 2021-2026 թվականների գործունեության ծրագրում Հայաստանի կառավարությունը նախատեսում է ռազմավարական հեռանկարում աստիճանաբար անցում կատարել պրոֆեսիոնալ բանակի։
Առաջիկայում կառավարությունը ձգտելու է զինծառայության ժամկետների կրճատմանը՝ ի հաշիվ պայմանագրային ծառայության աճի։
Որոշումների կայացման ժամանակահատվածը կրճատելու նպատակով ներդրվելու է միասնական ավտոմատացված կառավարման այնպիսի համակարգ, որն ապահովելու է ժամանակակից ռազմական գիտությանը համահունչ արագ և առաջանցիկ որոշումների կայացումը: Այդ նպատակով Զինված ուժերում իրականացվելու են կազմակերպչական և հաստիքային փոփոխություններ:
Ծրագրի համաձայն՝ իրականացվելու է դաշնակից և գործընկեր պետությունների հետ ռազմական և ռազմատեխնիկական համագործակցություն՝ մասնավորապես ընդլայնվելով համագործակցությունը Ռուսաստանի Դաշնության հետ։
Ներգրավված ուժերին զուգահեռ տեխնիկական նոր լուծումներ կստեղծվեն։
Նոր թափ են ստանալու նաև զինծառայողների աշխատավարձերի և այլ վճարների բարձրացումը, բնակարանային ապահովման ուղղությամբ Կառավարության ծրագրերը, պատերազմի հետևանքներն իրենց վրա կրող զինծառայողների սոցիալական և առողջապահական ծրագրերը։
