Ռոբերտ Քոչարյանի և Արմեն Գևորգյանի գործով դատական նիստն այսօր սկսվեց օգոստոսի 24-ի նիստում Գևորգյանի պաշտպան Էրիկ Ալեքսանյանի վարքի քննարկմամբ, քանի որ Ալեքսանյանը օգոստոսի 24 -ի նիստում առանց դատարանի որոշման նիստերի դահլիճը լքել էր:
Գործով դատավոր Աննա Դանիբեկյանը հայտարարեց, որ Ալեքսանյանի նկատմամբ կիրառվելու է սանկցիա, ինչից հետո Էրիկ Ալեքսանյանը հայտարարեց, որ այլևս չի պաշտպանում Գևորգյանի շահերը դատարանում:
«Խնդրում եմ իմ՝ որպես Արմեն Գևրոգյանի պաշտպան, պարտավորությունները դադարեցնել, որովհետև դուք հակակրանք ունեք իմ նկատմամբ։ Ես նման պայմաններում այլևս չեմ կարող շարունակել Արմեն Գևորգյանի պաշտպանությունը, ես հայտարարում եմ, որ հետայսու Արմեն Գևորգյանի շահերը պաշտպանել չեմ կարող», – դիմելով դատավորին՝ ասաց Ալեքսանյանը: Արմեն Գևորգյանն էլ հայտարարեց, որ ստեղծված իրավիճակում Էրիկ Ալեքսանյանը չի կարող պաշտպանել իր շահերը, քանի որ դատավորի և Ալեքսանյանի հարաբերությունները չեն բխում իր շահերից և հավալեց, որ պատրաստվում է նոր պաշտպան ներգրավվել այս գործում:
