Սպիտակի պոլիկլինիկան նոր ռենտգեն սարք ունի

Առողջապահության նախարար Անահիտ Ավանեսյանն այցելել է Լոռու մարզ՝ ներկա գտնվելու Սպիտակի բժշկական կենտրոնում թվային ճառագայթագրման և ֆլյուրոսկոպիայի ժամանակակից սարքի նվիրաբերման արարողությանը: Միջոցառմանը ներկա էին նաև Հայաստանում ԱՄՆ դեպան Լին Թրեյսին, Լոռու մարզպետ Արամ Խաչատրյանը, առողջապահական ոլորտի ներկայացուցիչներ: 

Ռենտգեն սարքը ներառված է նոր կորոնավիրուսի համավարակի դեմ պայքարին աջակցելու նպատակով առողջապահության նախարարությանը տրամադրվող սարքավորումների շարքում և տրամադրվել է ԱՄՆ Եվրոպական հրամանատարության Մարդասիրական աջակցության ծրագրով:

Այն կծառայի Սպիտակ քաղաքի և հարակից բնակավայրերի շուրջ 40 հազար բնակիչներին բուժօգնություն տրամադրելուն: Նախարար Անահիտ Ավանեսյանն ընդգծեց COVID-19 համավարակի մեկնարկից ի վեր երկրների որդեգրած համերաշխության սկզբունքը` մարտահրավերներին միահամուռ արձագաքնելու նպատակով:

«Համերաշխության գեղեցիկ օրինակ են COVID-19 համավարակի, ինչպես նաև հետպատերազմական շրջանում ՀՀ առողջապահության համակարգում ԱՄՆ կառավարության իրականացրած մի շարք ներդրումները»,- ասաց Անահիտ Ավանեսյանը: 

Նրա խոսքով` մարդկանց կյանքի որակի կարևորագույն գրավականը առողջությունն ու կրթությունն են, և պետք է անել առավելագույնը բոլոր բնակավայրերում այդ երկու կարևոր հենասյուները հավասարապես զարգացնելու համար: «Նոր կորոնավիրուսի համավարակը սկսվելուն պես մենք սերտորեն գործակցել ենք ՀՀ կառավարության հետ` ի նպաստ մարդկանց ապահով կենսագործունեության և առողջության:

ԱՄՆ Եվրոպական հրամանատարության Մարդասիրական աջակցության ծրագրով տրամադրված բուժսարքավորումները կմեծացնեն ՀՀ առողջապահական համակարգի կարողությունները նոր կորոնավիրուսի պացիենտների ախտորոշման ու բուժման հարցում»,- իր ելույթում նշեց ԱՄՆ դեսպան Լին Թրեյսին: 

Մասնակիցները հույս հայտնեցին, որ այս ներդրումը կնպաստի մարզում բժշկական ծառայությունների որակի բարելավմանը և բժիշկների մասնագիտական կարողությունների զարգացմանը: