ԲԴԽ անդամ Նախշուն Տավարացյանի լիազորությունները չեն դադարեցվի

Վճռաբեկ դատարանի դատավոր, ԲԴԽ անդամ Նախշուն Տավարացյանի լիազորությունները չեն դադարեցվի:

Քիչ առաջ նման որոշում կայացրեց Բարձրագույն դատական խորհրուրդը՝ այդպիսով մերժելով Գրիգոր Բեքմեզյանի, Հայկ Հովհաննիսյանի և Լիպարիտ Մելիքջանյանի դիմումները՝ Տավարացյանի լիազորությունները դադարեցնելու պահանջի վերաբերյալ:

Վճռաբեկ դատարանի դատավոր Նախշուն Տավարացյանը, որը ԲԴԽ անդամ էր ընտրվել 2018թ-ի նոյեմբերի 8-ին, սակայն երդվել 2019թ-ի հուլիսի 15-ին, չի մասնակցել 2019թ-ի ընթացքում տեղի ունեցած ԲԴԽ 2-ից ավելի նիստի, մասնակցել է միայն սույն թվականի հուլիսի 15-ի նիստին։ Տավարացյանը, բացի այն, որ նիստերից բացակայելու հարգելի պատճառներ չի ներկայացրել, նաև իր չմասնակցած նիստերի վերաբերյալ չի հայտնել իր մասնակցությունը բացառող հանգամանքների մասին։ Եվ, քանի որ ՀՀ դատական օրենսգրքի 86-րդ հոդվածի 3-րդ մասի 5-րդ և 7-րդ կետերի համաձայն՝ ԲԴԽ անդամի լիազորությունները դադարեցվում են տարվա ընթացքում ԲԴԽ նիստերին անհարգելի պատճառով առնվազն երկու անգամ չմասնակցելու դեպքում, և իր մասնակցությունը բացառող հանգամանքների մասին չհայտնելու դեպքում, խորհրդի երեք անդամները հրավիրել էին նիստ՝ Տավարացյանի լիազորությունները դադարեցնելու պահանջով, որը սակայն մերժվեց: