Արման Բաբաջանյանը հանդիպել է Լիլիթ Մակունցի հետ

Հայաստանի սահմանների շուրջ լարված վերջին իրադարձությունների, արցախյան հիմնահարցի կարգավորման, ԵԱՀԿ Մինսկի խմբի շրջանակում ԱՄՆ-ի հետ աշխատանքի, Վաշինգտոնի հետ Երևանի երկկողմ ձևաչափով արդյունավետ հարաբերություններ կառուցելու, խորացնելու և զարգացնելու, Հայաստանի անվտանգային, տնտեսական, տեխնոլոգիական կարիքների գնահատման ու ՀՀ ռազմաքաղաքական ղեկավարության անելիքների ինչպես նաև շատ այլ հարցերի վերաբերյալ Վաշինգտոնում Հայաստանի դեսպանատանը արդյունավետ քննարկում ունեցանք ԱՄՆ-ում ՀՀ արտակարգ և լիազոր դեսպան Լիլիթ Մակունցի հետ, տեղեկացնում է ԱԺ նախկին պատգամավոր Արման Բաբաջանյանը։

Վերջին օրերի լարվածությունը Հայաստանի սահմաններին ցույց տվեց, թե ինչ ահռելի դիվանագիտական աշխատանքի կարիք կա բոլոր ուղղություններով: Մենք մշտական աշխատանքային խմբերի կարիք ունենք ուժային բոլոր կենտրոններում՝ Վաշինգտոնում, Մոսկվայում և Բրյուսելում:

Մեզ անհրաժեշտ են ամերիկյան և եվրոպական ուղեղային կենտրոններում Հայաստանի և տարածաշրջանի խնդիրների վերաբերյալ մշտական քննարկումներ։

Մեզ անհրաժեշտ է հավատալ սեփական ուժերին, ապավինել ազգային համահայկական կարողություններին, բանականությանը և հասկացված լինել աշխարհին՝ մեր գործընկերներին, ովքեր պատրաստ են ձեռք մեկնել, եթե մենք ընդունակ լինենք ձևակերպել մեր կարիքները: