Թուրքմենստանի նախագահ Գուրբանգուլի Բերդիմուհամեդովը հայտարարել է «երիտասարդ կառավարիչներին ճանապարհ տալու մտադրության մասին»։ Այդ երկրի կենտրոնական ընտրական հանձնաժողովը սկսել է արտահերթ նախագահական ընտրությունների պատրաստության գործընթաց։ Այդ մասին հայտնում է Туркменистан պետական տեղեկատվական գործակալությունը։
Նախօրեին տեղի ունեցած հանդիպման ժամանակ Բերդիմուհամեդովը հիշեցրել է, որ նախագահի պաշտոնում նա ընտրվել է ուղիղ 15 տարի առաջ՝ 2007 թվականի փետրվարի 11-ին։ «Ես աջակցում եմ այն միտքը, որ մեր երկրի զարգացման նոր փուլում դեպի պետական կառավարում ճանապարհը պետք է տալ երիտասարդ ղեկավարներին, որոնք դաստիարակվել են հոգևոր միջավայրում և ժամանակակից բարձր պահանջներին համապատասխան։ Իմ մեծ կենսական և քաղաքական փորձը ես մտադիր եմ հաջորդիվ էլ ուղղել այդ ուղղությամբ»,- հայտարարել է Բերդիմուհամեդովը։ Վերջինս նաև հայտարարել է, որ իր ապագայի վերաբերյալ շրջադարձային որոշում է կայացրել։ Բերդիմուհամեդովը հայտարարել է, որ կշարունակի զբաղեցնել Թուրքմենստանի խորհրդարանի վերին պալատի նախագահի պաշտոնը։ Նրա պնդմամբ՝ ինքը հասել է Մուհամեդ մարգարեի տարիքին։
РИА Новости-ի տվյալներով՝ Թուրքմենստանում արտահերթ նախագահական ընտրությունները նշանակվել են մարտի 12-ին։ Թուրքմենստանի ԿԸՀ-ն ТАСС գործակալությանը ևս հաստատել է արտահերթ ընտրությունների կազմակերպման հանգամանքը։ «Այո, նախագահը անցկացման հանձնարարական է տվել»,- նշել են Կենտրոնական ընտրական հանձնաժողովից։
Բերդիմուհամեդովի նախագահի պաշտոնից հեռանալու որոշման վրա կարող է մեծ ազդեցություն ունենալ նաև Ղազախստանում նախորդ ամիս տեղի ունեցած բողոքի ցույցերը, որոնք վեր էին ածվել համազգային անկարգությունների։ Դրանց արդյունքում նախագահ Տոկաևը, Ղազախստանի խորհրդարանը և նոր կառավարությունը Նազարբաևին ու նրա մերձավորներին զրկեցին մի շարք արտոնություններից ու պաշտոններից։
Մեծ է հավանականությունը, որ նախագահի պաշտոնին կառաջադրվի նրա որդին՝ Սերդար Բերդիմուհամեդովը, որը 2021 թվականի փետրվարից զբաղեցնում է Թուրքմենստանի փոխվարչապետի պաշտոնը՝ համակարգելով ֆինանսատնտեսական համալիրը։