Արցախի արտգործնախարար Դավիթ Բաբայանը մշակութային ցեղասպանություն անվանեց Ադրբեջանի իշխանությունների գործողությունները հայկական պատմական և մշակույթի հուշարձանների հանդեպ։ Լրագրողների հետ զրույցում Բաբայանը հայտարարեց, որ Ադրբեջանը սիստեմատիկ կերպով ոչնչացնում է հայկական հուշարձանները, քանդում ու ավերում գերեզմանատներն ու եկեղեցիները։
«Սա մշակութային ցեղասպանություն է, ու դա տարբեր եղանակներով է իրականացվում։ Առաջին` դա բարբարոսություն է, որով ոչնչացվում են մեր կոթողները, եկեղեցիները, գերեզմանաքարերը։ Երկրորդ` փորձ է արվում հայազրկել այդ մշակութային կոթողները։ Ինչ–որ «ալբանական թեզ» են շրջանառում։ Դա ուղղակի անհեթեթություն է։ Դա կիրառվում է այն դեպքում, երբ չեն կարողանում ոչնչացնել կոթողը։ Օրինակ` Դադիվանքը եթե իրենցով լիներ, վաղուց կոչնչացնեին, բայց փորձում են այսկերպ ոչնչացնել հայկականությունը և դարձնել ոչ հայկական մշակույթի կոթող»,–ասաց Բաբայանը։
Նրա կարծիքով՝ հայկական հուշարձանների «ալբանացումը» նույնքան ծիծաղելի է, որքան այն պնդումները, թե շումերներն են եղել ադրբեջանցիների նախնիները, թեև ադրբեջանական ազգի ձևավորման մասին պաշտոնապես հայտարարվել է 1936թվականին։«Քաղաքակիրթ աշխարհն էլ գոնե մի ձևով պետք է արձագանքի։ Ինչքան պետք է մենք միայնակ պայքարենք այս ամենի դեմ։ Իհարկե, մենք շարունակելու ենք պայքարը։ Սրա համար պետք է միասնություն, համախմբվածություն և ճիշտ աշխարհաքաղաքականություն»,- նշել է ԱՀ արտգործնախարարը։
Հիշեցնենք` ավելի վաղ Ադրբեջանի մշակույթի նախարարը հայտնել էր, որ ստեղծվել է փորձագետների աշխատանքային խումբ՝ վերացնելու «հայերի կողմից ալբանական կրոնական տաճարների վրա կատարված կեղծ գրությունները»։Հայտարարությունը մեծ աղմուկ առաջացրեց Հայաստանում։ Հանրությունը իշխանություններից պահանջում է դիմել ՄԱԿ–ի միջազգային դատարան։
