Ամերիկայի նախկին առաջնորդ և նախագահի հանրապետական ​​թեկնածու Դոնալդ Թրամփը, ով երկու ամսում մահափորձի է ենթարկվել, խոստովանել է, որ անհանգստացած է իր ընտանիքի անդամների անվտանգության համար։

«Ես, սովորաբար, չեմ խոսում այս մասին: Բայց այո, ես պետք է անհանգստանամ իմ ընտանիքի համար», – ասել է Թրամփը շաբաթ օրը Fox News-ին տված հարցազրույցում:
Թրամփին փորձել էին գնդակահարել հուլիսի 13-ին Փենսիլվանիայի Բաթլեր կոմսությունում նախընտրական հանրահավաքի ժամանակ։ Նա թեթև վիրավորվել էր։

Կրակողը՝ 20-ամյա ամերիկացի Թոմաս Մեթյու Քրուքսը, սպանվել է Գաղտնի ծառայության աշխատակիցների կողմից։ ԱՄՆ Հետաքննությունների դաշնային բյուրոն հաստատել է, որ միջադեպը դիտարկվում է որպես Թրամփի դեմ մահափորձ։