Ուկրաինայի նախագահ Վլադիմիր Զելենսկին ընդունել է Ղրիմի հարցում Ռուսաստանի հետ փոխզիջման, ինչպես նաև ինքնահռչակ Դոնեցկի և Լուգանսկի Ժողովրդական Հանրապետությունների անկախության ճանաչման հնարավորությունը։ Այս մասին նա հայտարարել է ABC News-ին տված հարցազրույցում։ Զելենսկու ուկրաիներեն պատասխանները հրապարակվել են նախագահի կայքում։
«Ինձ համար կարևոր է, թե ինչպես են այնտեղ ապրելու մարդիկ, ովքեր ցանկանում են լինել Ուկրաինայի կազմում։ Հետաքրքիր է, թե ինչ են մտածում նրանք, ովքեր իրենց տեսնում են որպես Ռուսաստանի Դաշնության քաղաքացի։ Այնուամենայնիվ, մենք պետք է քննարկենք այս հարցը։ Ճիշտ այնպես, ինչպես Ղրիմի հարցում փոխզիջումները։ Մենք չենք կարող ընդունել, որ Ղրիմը Ռուսաստանի տարածքն է. Կարծում եմ՝ Ռուսաստանի Դաշնության համար դժվար կլինի խոստովանել, որ դա Ուկրաինայի տարածքն է։ Կարծում եմ՝ մենք բավական խելամիտ ենք, որ այս երկու հարցերի լուծումը մեր հասարակություններում հեղափոխություններ չառաջացնի, որպեսզի և՛ այս տարածքներում ապրողները, և՛ Ուկրաինայում ապրողները գոհ լինեն այս որոշումից»։
Այս հարցերը լուծելու համար Զելենսկին կրկին կոչ է արել Պուտինին բանակցել։ Ուկրաինայի նախագահի խոսքով՝ իրեն ընտրած ժողովուրդը պատրաստ չէ կապիտուլյացիայի ու վերջնագրերի, սակայն Ռուսաստանն ու Ուկրաինան կարող են քննարկել Ղրիմի ու Դոնբասի ապագան։
Բացի այդ, Զելենսկին ասել է, որ Ուկրաինան պետք է կոլեկտիվ անվտանգության պայմանագիր կնքի իր հարևանների և աշխարհի առաջատար պետությունների՝ ԱՄՆ-ի, Ֆրանսիայի, Գերմանիայի հետ: Սրանք անվտանգության երաշխիքներ կլինեն ոչ միայն Ուկրաինայի, այլեւ Ռուսաստանի համար, ինչը մշտապես պնդում է Մոսկվան։
«ՆԱՏՕ-ի հետ կապված ես բազմիցս ասել եմ և հրապարակային ուղերձ եմ հղել թե՛ Ռուսաստանին, թե՛ նախագահ Պուտինին. մենք պատրաստ ենք մեր երկրի անվտանգության ցանկացած երաշխիքի համապատասխան պետություններից, որոնք պետք է երաշխավորեն։ Եվ այս պետությունների թվում է նաեւ Ռուսաստանը, քանի որ Ռուսաստանը մեր հարեւանն է»,- նշել է Զելենսկին։
