Հայաստանը շահագրգռված է շարունակել փոխշահավետ համագործակցությունը Եվրասիական տնտեսական միության շրջանակում։ Այս մասին հայտարարել է վարչապետ Նիկոլ Փաշինյանը՝ ԵԱՏՄ միջկառավարական խորհրդի նիստում, որին մասնակցել է տեսակապով։
«ԵԱՏՄ-ի հիմնարար սկզբունքներից մեկը ապրանքների, ծառայությունների և աշխատուժի ազատ տեղաշարժն է։ Ցավոք, գործնականում այդ սկզբունքները լիարժեք չեն իրականացվում»,- ասել է Փաշինյանը։
Նրա խոսքով՝ մի շարք սահմանափակումներ և վարչական միջոցներ շարունակում են խոչընդոտել ընդհանուր շուկայի լիարժեք գործունեությանը։ Փաշինյանը նաև նշել է, որ Հայաստանից Ռուսաստան ապրանքների արտահանման հետ կապված որոշ հարցերի շուրջ մինչ այժմ էական առաջընթաց չի արձանագրվել, սակայն անհրաժեշտ է շարունակել կառուցողական երկխոսությունը՝ առկա խոչընդոտները վերացնելու համար։
Փաշինյանը նաև խոսել է «TRIPP» նախագծի մասին՝ նշելով, որ այն կբացի ուղիղ երկաթուղային հաղորդակցություն Հայաստանի և Ադրբեջանի միջև։
Միաժամանակ, նախագիծը հնարավորություն կտա ինտեգրել Հայաստանը միջազգային երկաթուղային ցանցին և ստեղծել հնարավորություն Պարսից ծոցի և Սև ծովի միջև երկաթուղային հաղորդակցության ձևավորման համար։ Սա կդառնա դարակազմիկ իրադարձություն տրանսպորտային կապերի ոլորտում՝ փոփոխություն Հայաստանի, Ադրբեջանի, Վրաստանի և Իրանի համար։
