Երևանի քաղաքապետարանի աշխատակազմի լրատվության վարչության պետի ժամանակավոր պաշտոնակատար Տարոն Գևորգյանը պարզաբանում է ներկայացրել, որը ներկայացնում ենք ստորև․
«Հարգելի գործընկերներ,
ելնելով թեմայի վերաբերյալ հետաքրքրությունից՝ տեղեկացնում եմ, որ Երևանի քաղաքապետարանը որևէ առնչություն չունի ռուսական լրատվամիջոցներով տարածված՝ «Ի աջակցություն ռուս զինվորականների» անունը կրող ակցիայի հետ: Միաժամանակ, նշեմ, որ Համաձայն «Հավաքների ազատության մասին» օրենքի 9-րդ հոդվածի՝ (մեջբերում) հանրային հավաք անցկացնելու համար կազմակերպիչը գրավոր իրազեկում է լիազոր մարմնին, բացառությամբ մինչև 100 մասնակից ունեցող, շտապ և ինքնաբուխ հավաքների։(մեջբերման ավարտը):
Բացի այդ՝ համաձայն Երևան քաղաքում ՏԻՄ օրենքի 56.1 հոդվածի՝ (մեջբերում) եթե ակնկալվում է, որ հանրային միջոցառման մասնակիցների թիվը գերազանցելու է երեք հարյուրը, ապա այդ հանրային միջոցառումն անցկացվում է համայնքի ղեկավարի տեղեկացմամբ: Տեղեկացումն իրականացնում է հանրային միջոցառման կազմակերպիչը հանրային միջոցառման անցկացման օրվանից ոչ ուշ, քան 3 օր առաջ, կազմակերպչի նախընտրած հետևյալ եղանակներից որևէ մեկով` անձամբ, հեռախոսով կամ փոստի միջոցով (մեջբերման ավարտը): Նշված տարբերակներից որևէ մեկով Երևանի քաղաքապետարան ոչ ոք չի դիմել»:
