ՌԴ նախագահ Վլադիմիր Պուտինին տեղեկացրել են, որ Ուկրաինայում ռազմական գործողությանը ժամկետային զինծառայողներ են մասնակցել։ Պուտինը հանձնարարել է գլխավոր զինվորական դատախազությանը պարզել, թե ինչպես են ոչ պրոֆեսիոնալ զինվորականները հայտնվել մարտական գոտում։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։
Կրեմլի խոսնակի խոսքով՝ ռազմական գործողության մեկնարկից առաջ Վլադիմիր Պուտինը հրահանգել է զինված ուժերի ստորաբաժանումների բոլոր հրամանատարներին «կտրականապես բացառել ժամկետային զինծառայողների ներգրավումը Ուկրաինայի տարածքում որևէ առաջադրանք կատարելու համար»։ Վլադիմիր Պուտինին տեղեկացրել են, որ հրամանը կատարվել է, սակայն դրանից հետո փաստեր են պարզվել, որ ժամկետային զինծառայողներն ի վերջո հայտնվել են Ուկրաինայում։
«Ռուսաստանի նախագահի ցուցումով Ուկրաինայի տարածքում հատուկ ռազմական գործողության մասնակցող զինված ուժերի ստորաբաժանումներում մի շարք ժամկետային զինծառայողների առկայության փաստերի կապակցությամբ նյութեր են ուղարկվել Գլխավոր զինվորական դատախազություն, որը պետք է ստուգի և օրինական գնահատի գործողությունները և պատժի պաշտոնյաներին, ովքեր պատասխանատու են այս հրահանգը չկատարելու համար», – լրագրողներին ասել է Պեսկովը:
Մարտի 9-ին ՌԴ ՊՆ-ն խոստովանել է, որ Ուկրաինայում ռազմական գործողությանը ժամկետային զինծառայողներ են մասնակցում։ Գործակալության տվյալներով՝ այս պահին նրանք դուրս են բերվում մարտական գործողությունների գոտուց։ Ավելի վաղ ՊՆ-ն և Վլադիմիր Պուտինը հերքել էին, որ ժամկետային զինծառայողները գտնվում են պատերազմական գոտում։ Պետության ղեկավարի խոսքով՝ մարտական առաջադրանքները կատարում են «միայն պրոֆեսիոնալ զինվորականները»։
Սկզբնաղբյուրը՝ kommersant.ru
