Գիշերվա ընթացքում Խրամորթ գյուղի ուղղությամբ ադրբեջանական զինված ուժերը կիրառել են նաև ականանետեր. մեկ քաղաքացիական անձ վիրավոր է։ Տեղեկությունը հայտնում է ՀՀ մարդու իրավունքների պաշտպան Քրիստինե Գրիգորյանը։
«Հակառակորդը գյուղի ուղղությամբ ցուցադրաբար կուտակել է նաև ծանր տեխնիկա (տանկեր)։ Բնակչության ապահովության համար գիշերը կանայք և երեխաները տարհանվել են առավել ապահով վայր, սակայն ըստ գործընկերներիս տեղեկությունների, բնակիչներն առավոտյան վերադարձել են գյուղ»,–գրել է Գրիգորյանը։
Նրա խոսքով` երեկ օրվա ընթացքում ինտենսիվ կրակոցներ են եղել Ասկերանի շրջանի Խրամորթ գյուղի, Մարտունու շրջանի Կարմիր Շուկա և Խնուշինակ գյուղերի ուղղությամբ։ Խրամոթի ուղղությամբ օրվա ընթացքում կրակոցներն ուղեկցվել են բնակչության նկատմամբ հոգեբանական ճնշում գործադրելու հանցավոր գործողություններով. բնակչությանը՝ գյուղը լքելու մասին բարձրախոսով հայերեն լեզվով «նախազգուշացումներ» անելով։Գրիգորյանը նշել է, որ ակնհայտ է` նման գործողությունների վերջնանպատակը բնակավայրերը հայաթափելն ու դատարկելն է իր բնիկ ժողովրդից, ինչն Ադրբեջանի կողմից շարունակվող հայատյացության ու էթնիկ ատելության քաղաքականության դրսևորում է։
Մյուս կողմից, ըստ ՀՀ ՄԻ պաշտպանի, սա ադրբեջանական պետության կողմից անպատասխանատու վարքագիծ է, որը միտված է ռուսական խաղաղապահ առաքելության հեղինակության վնասմանն ու խաղաղ կյանքի ապահովման ուղղությամբ գործադրվող հսկայական ջանքերի նսեմացմանը։Գրիգորյանն այս մասին տեղեկությունները կուղարկի համապատասխան միջազգային կազմակերպություններին ու դեսպանությունների։
