Մարդու իրավունքների պաշտպան Քրիստինե Գրիգորյանը հանդիպել է Հայաստանում ԵՄ պատվիրակության ղեկավար, ԵՄ դեսպան Անդրեա Վիկտորինիին։ ՄԻՊ-ը ԵՄ դեսպանին հայտնել է իր մտահոգությունները Արցախի վերաբերյալ։ Այս մասին հայտնում է ՀՀ ՄԻՊ Քրիստինե Գրիգորյանը։
«Հանդիպման ընթացքում պաշտպանը դեսպանին մանրամասներ է ներկայացրել Արցախ կատարած իր այցի և արձանագրած խնդիրների վերաբերյալ»,–ասվում է հաղորդագրության մեջ։
Դեսպանը կարևորել է պաշտպանի հաստատության անկախությունը և ընդգծել, որ բազմաթիվ խնդիրների թիրախավորման և լուծման հարցում գործել են ՄԻՊ գրասենյակի հետ կառուցողական համագործակցությամբ:
Հանդիպման ընթացքում կողմերն անդրադարձել են պատերազմների բերած արհավիրքներին և այդ համատեքստում ընդգծել՝ մարդու իրավունքների պաշտպանության համընդհանուր սկզբունքների պահպանման, խախտումների արձանագրման և միջազգային կազմակերպություններում հետևողական բարձրացման կարևորությունը։
Քննարկվել են նաև ատելության խոսքի դեմ պայքարի ինստիտուցիոնալ մեխանիզմների ներդրման հնարավորությունները։
