«Կարող ենք Հայաստանով, սփյուռքն էլ վրադիր՝ ամբողջ ազգուտակով կանգնել Արաքսի ափին՝ հայ-թուրքական սահմանին ու գոռալ որ թուրքը մեր ոխերիմ թշնամին է: Բայց հասունություն ունենանք արձանագրելու, որ դրանից թե մեր ուժը չի ավելանալու, թե Թուրքիայի ուժը չի պակասելու: Դա այն ծուղակն է, որում մեզ պահել և պահում են հյուսիսից:
Ծուղակ, որպեսզի հայկական պետականությունից այս տարածաշրջանում ոչինչ կախված չլինի, որպեսզի Հայաստանը իրենից ոչինչ չներկայացնի, ոչինչ չկարողանա փոխել։ Չփոխել ոչինչ, նշանակում է չփոխել ռեգիոնում հաստատված նոր՝ ռուս-թուրքական աշխարհակարգի դոմինանտությունը, որը «կնքվեց» Արցախի դեմ 44-օրյա պատերազմով, իսկ հիմա ավելի ամրապնդվում է ռուս-ուկրաինական պատերազմի արդյունքում։
Թուրքիայի հետ Հայաստանի հարաբերության հաստատման մերժումն է տարածաշրջանում Ռուսաստանի ներկայության միակ շանսը և հույսը: Միևնույն ժամանակ Ռուսաստանի այդ ներկայությունն է ռեգիոնում իր պլանները առաջ տանելու Թուրքիայի միակ հուսալի երաշխիքը, որովհետեւ թուրքերը գիտեն իրենց ակնհայտ և համակողմանի առավելությունը Ռուսաստանի հանդեպ:
Եթե ռեգիոնը բացվի, թուրքերի մրցակիցը այստեղ կարող են դառնալ ամերիկացիները, ֆրանսիացիները, արաբները: Սրանցից որեւէ մեկի նկատմամբ Թուրքիան չունի առավելություն, իսկ Ռուսաստանի հանդեպ ունի, ուստի Թուրքիան ամեն ինչ անելու է, որ այս տարածաշրջանում իր գլխավոր մրցակիցը մնա Ռուսաստանը, ոչ թե ԱՄՆ-ը, ԵՄ-ը կամ Չինաստանը»,- գրել է Հանուն Հանրապետության կուսակցության նախագահ Արման Բաբաջանյանը։
