Տավուշի մարզ. խոստացված, բայց չհրապարակված աշխատատեղեր

Հուլիսի 17-ին Իջևանում փայտի գործով զբաղվողները փակել էին միջպետական ճանապարհը: Ցուցարարների մոտ էր եկել նաև Տավուշի մարզպետ Հայկ Չոբանյանը: Նա փայտի օգտագործման պայմաններից բացի, անդրադարձավ նաև աշխատատեղերի հարցին:

«Վաղը առավոտյան մեր կայքում հայտարարություն կբացվի, վաղվա համար առնվազն 50 աշխատատեղ՝ 8 հազարից 15 հազար դրամ օրական, ինչ աշխատանք ա, ինչ ա իրենից ներկայացնում: Յուրաքանչյուրդ կարող եք գալ մարզպետարան և այդ աշխատանքի առաջարկը ստանալ ու գնալ աշխատել»,-ցուցարարների հետ զրույցում ասել էր Հայկ Չոբանյանը:
Այսօր արդեն հուլիսի 27-ն է և մարզպետարանի կայքում այդպես էլ չգտանք օրական 8-15 հազար դրամ աշխատավարձով առնվազն 50 աշխատատեղի մասին մարզպետ Չոբանյանի խոստացած հայտարարույթունը:

«Հետք»-ը գրավոր դիմել էր Տավուշի մարզպետին, խնդրելով տրամադրել տեղեկություններ, թե մարզում քանի թափուր աշխատատեղ կա, ինչ չափի վարձատրությունով: Հետաքրքրվել էինք նաև, եթե կան թափուր աշխատատեղեր, ապա ի՞նչն է պատճառը, որ մարզի բնակիչները չեն դիմում:

Մարզպետը պատասխանել է, թե առկա թափուր աշխատատեղերում աշխատելու համար բնակիչների չդիմելու պատճառները դեռևս ուսումնասիրված չեն, և նման տվյալների չեն տիրապետում: Այնուամենայնիվ, նշել է, որ հուլիսի 24-ի դրությամբ և համաձայն Զբաղվածության պետական գործակալության տարածքային կենտրոնների ներկայացրած տվյալների, մարզում կա 355 թափուր աշխատատեղ, որն ամենօրյա ռեժիմով թարմացվում են: Գրության մեջ նշված է, որ թափուր աշխատատեղերի ցանկը և աշխատավարձերի չափերի մասին տեղեկատվությունը կարող ենք ստանալ գործակալության ինտերնետային էջից:

Հուլիսի 26-ի դրությամբ, տարածքային կենտրոնները հրապարակել են 418 թափուր աշխատատեղի վերաբերյալ տեղեկատվություն: Օրինակ՝ Դիլիջանի զբաղվածության կենտրոնը հրապարակել է 71 աշխատատեղի վերաբերյալ հայտարարություն: Ամենաբարձր աշխատավարձի չափով՝ ամսական 300,000 դրամ, ընդամենը մեկ աշխատատեղ կա՝ տեղեկատվական տեխնելոգիաների սպասարկման մասնագետ: 250,000 դրամ աշխատավարձով ևս մեկ թափուր աշխատատեղ կա, փնտրում են բեռնող մեխանիզմների մեքենավար: Նույն աշխատանքի համար մեկ այլ գործատու պահանջում է 3 աշխատող, սակայն արդեն 200,000 դրամ աշխատավարձով: 3 թափուր աշխատատեղ էլ կա ամսական 150,000 դրամ աշխատավարձով, փնտրում են մանկապարտեզի դայակ, խոհարար, հայոց լեզվի և գրականության ուսուցչուհի: Մնացած աշխատատեղերի համար ամսական վարձատրության չափը 150,000 դրամից պակաս է: Օրինակ՝ 78,000 դրամով առաջարկում են հոգեբույժի, մանկաբույժի, բարմենի և այլ աշխատանք:

Ավելին՝ hetq.am