ԱՄՆ Պետդեպարտամենտը երկուշաբթի օրը հայտարարել է, որ պատժամիջոցներ է սահմանում Ռուսաստանի պաշտպանության ոլորտի 11 բարձրաստիճան ներկայացուցիչների, այդ թվում՝ Ազգային գվարդիայի ղեկավար Վիկտոր Զոլոտովի, Ռազմատեխնիկական համագործակցության դաշնային ծառայության տնօրեն Դմիտրի Շուգաևի, «Ռոսօբորոնէքսպորտ» ընկերության գլխավոր տնօրեն Ալեքսանդր Միխեևի, ինչպես նաև Ռուսաստանի Դաշնության պաշտպանության նախարարի ութ տեղակալների նկատմամբ:
«Աշխարհը սարսափով է նայում, քանի որ Ռուսաստանը կանխամտածված, չհիմնավորված հարձակում է իրականացնում Ուկրաինայի վրա: Այսօր Պետդեպարտամենտը շարունակում է ծանր վնասներ պատճառել Ռուսաստանի պաշտպանության ղեկավարներին», – ասվում է հայտարարության մեջ:
Պատժամիջոցների ցանկում ներառված են նաև ՌԴ պաշտպանության փոխնախարարներ Ալեքսեյ Կրիվորուչկոն, Թիմուր Իվանովը, Յունուս-Բեկ Եվկուրովը, Դմիտրի Բուլգակովը, Յուրի Սադովենկոն, Նիկոլայ Պանկովը, Ռուսլան Ցալիկովը և Գենադի Ժիդկոն:
Պատժամիջոցների ցուցակում ընդգրկվելը նշանակում է ԱՄՆ-ում ակտիվների սառեցում և ամերիկյան քաղաքացիների կամ ընկերություններին արգելք բիզնես վարել վերջիններիս հետ, ասվում է փաստաթղթում։
