Սյունիքի Ներքին Հանդ գյուղում ադրբեջանցիների կողմից որևէ առաջխաղացում չկա, բայց իրավիճակը մնում է լարված:
Այս մասին այսօր լրագրողների հետ ճեպազրույցի ընթացքում ասաց ՊՆ փոխնախարար Արման Սարգսյանը, անդրադառնալով՝ մամուլում շրջանառվող տեղեկություններին, թե ադրբեջանական կողմը Սյունիքի Հանդ գյուղում առաջացխաղացում է ունեցել:
«Մարտի 13-14-ից ու այսօր իրավիճակը մնում է լարված: Կարող ենք բնորոշել կայուն լարված: Լարվածությունը հատկապես Արցախի հատվածում է մեծ: Բայց, մեր կողմից ձեռնարկվում են միջոցներ, որպեսզի բանակցությունների և այլ գործողությունների միջոցով հնարավոր սադրանքներ ու էսկալացիա ադրբեջանական կողմից չլինի: Որևէ տեղ նրանք առաջխաղացում չունեն»,- ասաց փոխնախարարը:
Նրա խոսքով՝ ադրբեջանական կողմի հայտարարությունները խուճապային տրամադրություն ստեղծելու և Արցախը հայաթափելու համար են: Եթե հակառակորդի կողմից առաջխաղացում լինի, ՊՆ հատուկ ստորաբաժանումները համապատասխան քայլեր կձեռնարկեն: «Հայաստանում որևէ բան չի կարելի թաքցնել, եթե նման խնդիր լինի պաշտպանության նախարարությունը կտեղեկացնի հասարակությանը:
Հայաստանի սուվերեն տարածք ոչ ոք չի մտել: Մեր ստորաբաժանումները զգոն են: Ես չեմ կարող բացառել որևէ սադրանք, որևէ պաշտոնյա չի կարող դա բացառել՝ կապված աշխարահաքաղաքական փոփոխություններով: Միգուցե հնարավոր քայլեր ու սադրանքներ հակառակորդի կողմից ձեռնարկվի, սակայն, վստահ ասում եմ, որ մեր կողմից որևէ ագրեսիվ քայլեր չեն իրականացվում: Չի եղել դեպք, երբ մենք նրանց ագրեսիային չդիմադրենք»,- հավելեց Սարգսյանը:
