Ադրբեջանական կողմի ակնհայտ միջամտությամբ Շուշի քաղաքի մոտակայքում՝ ադրբեջանական վերահսկողության տակ գտնվող տարածքում, կրկին խափանվել է Հայաստանից բնական գազի մատակարարումը Լեռնային Ղարաբաղ:
Այս մասին հայտարարություն է տարածել ՀՀ ԱԳՆ-ը:
«Այսպիսով՝ ձյան աննախադեպ տեղումների և աննախադեպ ցրտաշունչ եղանակային պայմաններում Լեռնային Ղարաբաղի շուրջ 120.000 բնակչությունը զրկվել է կենսական անհրաժեշտ գազամատակարարումից։
Ընդամենը մի քանի օր առաջ Ադրբեջանը 8 օր շարունակ թույլ չէր տալիս աշխատանքներ իրականացնել նույն տեղանքում չպարզված հանգամանքներում վթարված գազատարի վերանորոգման ուղղությամբ։
Այսպիսով, բացի Լեռնային Ղարաբաղի բնակչության նկատմամբ հոգեբանական ճնշում գործադրելուն ուղղված իր մյուս շարունակական գործողություններից և Լեռնային Ղարաբաղ միջազգային հումանիտար կառույցների մուտքը խոչընդոտելուց, Ադրբեջանը միտումնավոր կերպով խաթարում է Լեռնային Ղարաբաղում կենսական նշանակություն ունեցող ենթակառուցվածքների բնականոն աշխատանքը, ինչն ակնհայտորեն հանգեցնում է Լեռնային Ղարաբաղում հումանիտար ճգնաժամի ստեղծմանը։ Անթույլատրելի ենք համարում արցախահայության նկատմամբ սիստեմատիկ բռնության այս աղաղակող քաղաքականությունը։
Ստեղծված իրավիճակը հրատապ է դարձնում հումանիտար ճգնաժամի կանխման նպատակով միջազգային հանրության հստակ արձագանքը, ինչպես նաև միջազգային հումանիտար կառույցների անհապաղ և անխոչընդոտ ներգրավվածությունը Լեռնային Ղարաբաղում»,- ասված է հայտարարության մեջ։
Ավելի վաղ հայտարարությամբ էր հանդես եկել Արցախի ԱԳՆ-ը՝ կրկին դատապարտելով Ադրբեջանի քաղաքականությունը և դիմել միջազգային հանրությանը՝ համարժեք գնահատականի ակնկալիքով:
Հիշեցնենք, որ ադրբեջանական կողմի ուղիղ միջամտության հետևանքով երեկվանից Արցախի Հանրապետությունում կրկին դադարեցվել է գազամատակարարումը:
Հիշեցնենք նաև, որ Հայաստանի Հանրապետությունից Արցախ գնացող հիմնական գազատարի վնասման հետևանքով Արցախի ամբողջ տարածքը մարտի 8-ից զրկված էր գազամատակարարումից։ Այն վերականգնվել էր մարտի 18-ին, բնակիչներին բնական գազը հասանելի էր դարձել մարտի 19-ից:
