-Մենք վստահ ենք, որ Հայաստանը և Թուրքիան կարող են և արժի, որ հարաբերություններ հաստատեն և բացեն սահմանները: Այս մասին այսօր Ազգային ժողովում կառավարության հետ հարց ու պատասխանի ժամանակ ասաց արտաքին գործերի նախարար Արարատ Միրզոյանը՝ անդրադառնալով հայ-թուրքական հարաբերությունների կարգավորմանն ուղղված գործընթացին:
«Կարծում եմ, որ այս գործընթացի մեջ երկու նախարարների հանդիպումը ևս իր դրական ազդեցությունը ունեցավ, կոնկրետ պայմանավորվածություն ձեռք չբերվեց, բայց վերահաստատեցինք երկու կողմերն էլ, որ շարունակում ենք երկխոսությունը, գործընթացը՝ առանց նախապայմանների՝ նպատակ ունենալով բացել սահմանը»,- ասաց նա:
Անդրադառնալով չարչրկված փողկապի թեմային՝ նա նշեց, որ այդ ֆորումն առանց փողկապների ֆորմատ էր հայտարարված, և մի օր մի մասը կրում էր փողկապ, մյուս օրը մյուսներն էին կրում: «Ինձ կարող եք Չավուշօղլուի հետ հանդիպման ժամանակ տեսնել փողկապով, իսկ Ավստրիայի ԱԳ նախարարի հետ ես եմ առանց փողկապի»,- ասաց նա:
Ինչ վերաբերում է ժպիտի թեմայի շահարկմանը, ապա նա ասաց. «Ողջ հարգանքով մեր բոլոր զոհերի ընտանիքների զգացմունքների նկատմամբ, եթե ես իմանամ, որ իմ ժպիտը կարող է ապագայում գեթ մեկ հայ զինվորի կյանք փրկել, ապա ես էլի կժպտամ ու էլի կժպտամ, ու էլի կժպտամ»,- ասաց նա:
